திண்டுக்கல் மாவட்டம், கொடைக்கானல் தமிழ்நாட்டின் முக்கிய சுற்றுலாத் தலங்களில் ஒன்றாகும். இங்குள்ள மக்கள் சுற்றுலாத் தொழிலை நம்பியே வாழ்ந்து வருகின்றனர். இந்நிலையில் கரோனா தடுப்பு நடவடிக்கையாக ஊரடங்கு பிறப்பிக்கப்பட்டுள்ளதால், சுற்றுலாத் தலங்களில் கடை வைத்திருப்பவர்கள், சுற்றுலா வாகன ஓட்டிகள், வழிகாட்டிகள் எனப் பல்வேறு தரப்பினர் கடுமையாகப் பாதிக்கப்பட்டுள்ளனர்.
இப்பெருந்தொற்று காரணமாக, சுமார் 50 ஆயிரத்திற்கும் மேற்பட்டோர் வாழ்வாதாரம் இழந்து தவித்து வருகின்றனர். இதனிடையே அன்றாட பிழைப்பிற்கு வழி இல்லாததால் தங்களுக்கு உதவக்கோரி, அரசுக்குப் பல முறை தெரிவித்தும் எந்த ஒரு நடவடிக்கையும் இல்லை என்று வேதனை தெரிவித்துள்ளனர்.
எனவே, கொடைக்கானலில் வர்த்தகம் உள்ளிட்ட அனைத்து சங்கத்தினர் வருவாய் கோட்டாட்சியர் அலுவலகத்தை முற்றுகையிட்டு போராட்டத்தில் ஈடுபட்டனர்.
தங்களின் குடும்ப அட்டை, ஆதார் அட்டை என அரசு ஆவணங்கள் அனைத்தும் வட்டாட்சியரிடம் ஒப்படைக்கப் போவதாகத் தெரிவித்தனர். இதையடுத்து கொடைக்கானல் காவல் துறையினர் மற்றும் வட்டாட்சித்துறையினர் போராட்டத்தில் ஈடுபட்டவர்களுடன் பேச்சுவார்த்தை நடத்தினர். தொழிலாளர்களின் குறைகள் அரசின் கவனத்துக்கு எடுத்துச் செல்லப்படும் என காவல் துறையினர் உறுதி அளித்ததைத் தொடர்ந்து, போராட்டத்தில் ஈடுபட்டவர்கள் கலைந்து சென்றனர்.
