தஞ்சையில் மீண்டும் புத்துயிர் பெறுமா குதிரை சந்தை?

தஞ்சை: அதிராம்பட்டினத்தில் நீண்டகாலமாக தடைசெய்யப்பட்டிருந்த குதிரை சந்தை இளைஞர்களின் அதீத ஆர்வத்தால் தற்போது மீண்டும் தொடங்கப்பட்டுள்ளது.

தஞ்சை மாவட்டம் பட்டுக்கோட்டை அருகில் இருப்பது அதிராம்பட்டினம் கிராமம். இந்தப் பகுதியை அதிவீரராம பாண்டியன் என்ற மன்னன் ஆட்சி செய்ததனால் இந்த ஊருக்கு அதிவீரராம பட்டினம் என்ற பெயர் உருவானது.

நாளடைவில் இந்தப் பெயர் மாறி அதிராம்பட்டினம் என்று அழைக்கப்பட்டது. இந்த ஊர் மன்னர்கள் ஆட்சி செய்த பகுதி என்பதால் இந்த பகுதியில் அந்த காலகட்டங்களில் மன்னர்கள் பயன்படுத்தும் குதிரைகளை விற்பனை செய்ய மிகப்பெரிய குதிரை சந்தை உருவானது.

இந்த குதிரை சந்தைகளில் இருந்து பல்வேறு நாடுகளுக்கு குதிரைகளை வாங்கிச் செல்ல இங்கு வியாபாரிகள் முகாமிட்டு குதிரைகளை வாங்கிச் செல்வர். அதேபோல் சவுதி அரேபியா, குவைத், துபாய் உள்ளிட்ட வளைகுடா நாடுகளில் இருந்தும் குதிரைகளை இங்கு கொண்டு வரவும், இங்கு வாங்கிய குதிரைகளை மீண்டும் அங்கு எடுத்துச் செல்லவும் கடல் வழியை அப்போதைய காலகட்டங்களில் பயன்படுத்தி வந்தனர்.

இதற்காகவே அதிராம்பட்டினத்தில் மிகப்பெரிய கப்பல் துறைமுகம் ஒன்றும் அமைக்கப்பட்டது. இந்நிலையில், மன்னர் காலம் முடிந்து ஆங்கிலேயர் காலம் தொடங்கியதும் ஆங்கிலேயர் காலத்திலும் இந்த குதிரை சந்தை மூலமாக குதிரை வணிகம் அமோகமாக செயல்பட்டுக் கொண்டிருந்தது. நாளடைவில் கார் உள்ளிட்ட வாகனங்கள் கண்டுபிடிக்கப்பட்டு புழக்கத்தில் வந்ததை அடுத்து குதிரையின் தேவை குறைந்துபோனது.

இதையடுத்து கொஞ்சம் கொஞ்சமாக குதிரை வாணிகம் குறைந்து அதிராம்பட்டினத்தில் குதிரை சந்தையும் எடுக்கப்பட்டது. சந்தை எடுக்கப்பட்டதையடுத்து கப்பல் துறைமுகமும் மூடப்பட்டது. இந்நிலையில் நீண்ட வருடங்கள் இடைவெளிக்குப் பின்னர் தற்போது அதிராம்பட்டினத்தில் உள்ள இளைய தலைமுறையினர் குதிரை விற்பனையில் ஆர்வம் கொண்டு குதிரைகளை வாங்கியும் தமிழ்நாட்டில் பல்வேறு பகுதிகளில் விற்பனை செய்தும் வரத் தொடங்கியுள்ளனர். இவர்கள் பஞ்சாப், ராஜஸ்தான் உள்ளிட்ட மாநிலங்களில் இருந்தும் குதிரைகளை வாங்கி இங்கு கொண்டு வந்து அதிராம்பட்டினத்தில் ஒரு பண்ணை அமைத்து இங்கிருந்து மற்ற பகுதிகளுக்கு விற்பனை செய்து வருகின்றனர்.

குதிரைகளில் பல்வேறு வகைகள் இருந்தாலும் அதிக விலைபோகக் கூடிய மார்வாடி குதிரைகள்தான் இங்கு கொண்டுவந்து பராமரிக்கப்பட்டு விற்பனை செய்யப்படுகிறது. இந்த ரக குதிரைகள் அதிகபட்ச தொகையாக ரூ. 1 கோடி வரையிலும் குறைந்தபட்ச தொகை ரூ. 10 லட்சம் வரையிலும் இருக்கும் என்று கூறுகின்றனர்.

பல ஆண்டுகளுக்கு முன்னர் கொடிகட்டிப் பறந்த குதிரை சந்தை தற்போது இளைஞர்களின் முன்னெடுப்பால் மீண்டும் புத்துயிர் பெற்றுள்ளது.

இதையும் படிங்க: சேலத்தில் நடைபெற்ற தேசிய அளவிலான குதிரை ஏறும் போட்டிகள்..!