தஞ்சாவூர்: கும்பகோணம், தஞ்சை உள்ளிட்ட பல்வேறு இடங்களில் ‘பெனிபிட் பண்ட்’ என்ற பெயரில் தனியார் நிதி நிறுவனம் ஒன்று இயங்கி வந்தன. இந்த நிதி நிறுவன ஊழியர்கள் பொதுமக்களிடம் அதிக வட்டி தருவதாக ஆசைவார்த்தை கூறி பல கோடி ரூபாய் முதலீடு செய்ய வைத்தனர். பின்னர், முதலீட்டாளர்களுக்கு பணத்தை தராமல் மோசடி செய்துவிட்டு, நிதி நிறுவனத்தை இழுத்து பூட்டிவிட்டு தலைமறைவாகி விட்டனர். பணம் கொடுத்து ஏமாந்த வாடிக்கையாளர்கள் இது குறித்து தஞ்சை பொருளாதார குற்றப்பிரிவு காவல் அலுவலகத்தில் புகார் அளித்தனர்.
இதன் அடிப்படையில் தஞ்சை பொருளாதார குற்றப்பிரிவு காவல் துணை கண்காணிப்பாளர் முத்துக்குமார் தலைமையிலான காவல் துறையினர் தலைமறைவாக இருந்த தனியார் பெனிபிட் பண்ட் நிர்வாகிகள் ராமநாதன் (55), ராஜேஸ் (45) ஆகிய இரண்டு பேரை கடந்த மே 5 ஆம் தேதி கைது செய்தனர். மேலும், இந்த மோசடியில் தொடர்பு உள்ளவர்களையும் தேடி வந்தனர். திருச்சி மாவட்டத்தை தலைமை இடமாகக் கொண்டு தனியார் நிதி நிறுவனம் செயல்பட்டு வந்துள்ளது.
ஒன்பது பேரால் தொடங்கப்பட்ட இந்த நிதி நிறுவனம் திருச்சி, தஞ்சாவூர் உள்பட 10 இடங்களில் செயல்பட்டு இருந்துள்ளது. அதிக வட்டி தருவதாக இந்த நிறுவனத்தினர் ஆசை வார்த்தை கூறியதை நம்பி, நூற்றுக்கணக்கானோர் பல கோடி ரூபாய் இதில் முதலீடு செய்தனர். இந்நிலையில், பணத்தை திரும்பக் கேட்ட வாடிக்கையாளர்களுக்கு நிதி நிறுவனம் முறையாக பதில் அளிக்கவில்லை என கூறப்படுகிறது.
இதனால் தாங்கள் ஏமாற்றப்பட்டதை உணர்ந்த 500க்கும் அதிகமான முதலீட்டாளர்கள் பொருளாதார குற்றப்பிரிவு காவல் துறையினரிடம் புகார் செய்தனர். அதன் பேரில் தஞ்சாவூர் பொருளாதார குற்றப் பிரிவு காவல் துறையினர் வழக்குப்பதிவு செய்து தனியார் நிறுவனத்தைச் சேர்ந்த மேலும் இரண்டு பேரை (தம்பதி) மே 16 ஆம் தேதி கைது செய்தனர். இதில் தஞ்சாவூர் முனிசிபல் காலனியைச் சேர்ந்த பார்த்திபன் (43), அவரது மனைவி சுகந்தா தேவி (35) ஆகியோரை பொருளாதார குற்றப் பிரிவு காவல் துறையினர் கைது செய்தனர்.
இந்த புகாரின் பேரில் இதுவரை 48 லட்சம் ரூபாய் வரை மோசடி நடைபெற்றுள்ளது தெரிய வந்துள்ளது. மேலும், மீதமுள்ள குற்றவாளிகளை கைது செய்யும் பட்சத்தில் மோசடி செய்யப்பட்டுள்ள தொகை அதிகமாக கூடும் என எதிர்பார்க்கப்படுகிறது. பல கோடி ரூபாய் மோசடியில் இதுவரை 4 நபர்கள் கைது செய்யப்பட்டுள்ளனர், மீதமுள்ள 5 நபர்களை காவல் துறையினர் தீவிரமாக தேடி வருகின்றனர்.
இதையும் படிங்க: ஒருதலைக்காதல் விவகாரம்: பெண்ணின் கண்களை ஆட்டோவில் வரைந்த இளைஞர் மீது தாக்குதல் நடத்திய பெண் வீட்டார் கைது
