தஞ்சை மாவட்டம், பட்டுக்கோட்டையில் இருந்து 25 கிலோ மீட்டர் தூரத்தில் மனோரா கோட்டை உள்ளது. இது 1815 ஆம் ஆண்டில் இரண்டாம் சரபோஜி மன்னரால் கட்டப்பட்டது. ஆங்கிலேயர்கள் நெப்போலியனின் பிரெஞ்சு படையை வாட்டர்லூ போரில் தோற்கடித்தது. இதன் வெற்றிச் சின்னமாகத்தான் இக்கோட்டை எழுப்பப்பட்டிருக்கிறது என்று வரலாற்றுச் சான்று கூறுகிறது. இந்த கோட்டை எட்டு அடுக்குகளைக் கொண்டு என்முக வடிவத்தில் 23 மீட்டர் உயரத்தில் இந்த கோபுர அமைப்பு வித்தியாசமான தோற்றத்துடன் காட்சியளிக்கிறது.
இந்தக் கோட்டையை சுற்றிலும் அகழிகள் அமைக்கப்பட்டுள்ளன. இந்த கோட்டையை சுற்றிலும் சிறுசிறு அறைகள், படைவீரர்கள் தங்குவதற்கென அமைக்கப்பட்டுள்ளன. மினா ரெட் என்னும் சொல்லில் இருந்தே மனோரா என்ற இந்த கோட்டை பெயர் பிறந்துள்ளது என்று கூறப்படுகிறது. 2004ஆம் ஆண்டு ஏற்பட்ட சுனாமி பேரலையின்போது, இந்த கோட்டை சேதமடைந்த நிலையில் மீண்டும் புதுப்பிக்கப்பட்டது. இதில் பயணிகள் ஓய்வு கூடம், குழந்தைகள் பூங்கா போன்றவையும் இந்த கோட்டை பகுதியில் உருவாக்கப்பட்டன. இந்த கோட்டையின் உச்சியிலிருந்து இலங்கையை பார்க்க முடியும் என்றும் இக்கோட்டைப் பகுதி கப்பல் துறைமுகமாக பயன்பட்டது என்றும் கூறப்படுகிறது.
இவ்வளவு வரலாற்றுச் சிறப்புமிக்க இந்த மனோரா கோட்டை தற்போது ஏற்பட்ட கஜா புயலாலும், நீண்டகாலமாக பராமரிக்கப்படாமல் இருப்பதாலும் அங்கு அமைக்கப்பட்டு இருந்த கோட்டை வேலிகள் மற்றும் தங்கும் குடில்கள் அனைத்தும் சேதம் அடைந்து வெறிச்சோடிக் கிடக்கிறது. தற்போது கோட்டை பராமரிக்கப்படாததால் சுற்றுலா பயணிகளின் வரத்து மிகக் குறைவாகவே உள்ளது. இதற்கு காரணம் இந்த கோட்டை மற்றும் இதன் சுற்றுவட்டார பகுதிகள் சேதமடைந்து இருப்பதுதான். இது தவிர சுற்றுலா பயணிகளுக்கென இந்தக் கடலில் படகு சவாரியும் நிறுத்தப்பட்டுள்ளது.
இந்நிலையில் இந்த மனோரா கோட்டை வளாகத்தில் அமைக்கப்பட்ட குடில்களுக்கு அருகில் தற்போது மதுபான கடை அமைக்கப்பட்டு குடிகாரர்களின் இருப்பிடமாக மாறி வருகிறது என்பது சமூக ஆர்வலர்களை மட்டுமல்லாமல் இப்பகுதியில் உள்ள அனைத்து தரப்பினரையும் வேதனையடையச் செய்துள்ளது. எனவே வரலாற்றுச் சின்னத்தை பாதுகாக்கவும், சுற்றுலாத் தலத்தை மேம்படுத்தும் விதமாகவும் உடனடியாக இந்த மனோரா கோட்டையை மீண்டும் பராமரித்து புதுப்பிக்க வேண்டும் என இப்பகுதி மக்கள் எதிர்பார்க்கின்றனர்.
