தஞ்சாவூர்: தமிழர்கள் கொண்டாடி மகிழும் முக்கிய விழாக்களில் ஒன்றான ஆடிப்பெருக்கு, கடந்த இரு ஆண்டுகளாக கரோனா பெருந்தொற்று பரவல் காரணமாக நீர் நிலைகளில் கொண்டாட முடியாத நிலை இருந்தது. இதில் சில ஆண்டுகளில் மேட்டூர் அணையில் தண்ணீர் திறப்பதில் தாமதம் ஏற்பட்டாலும், இந்த கொண்டாட்டத்தில் உற்சாகம் குறைந்த வண்ணமே இருக்கும்.
ஆனால் இந்த ஆண்டு இரண்டுமே கைகூடி வந்துள்ளது. ஏனென்றால், மேட்டூர் அணையில் முன்கூட்டியே தண்ணீர் திறந்து விட்டதால், தற்போது கும்பகோணம் மற்றும் அதன் சுற்று வட்டாரப் பகுதிகளில் காவிரி மற்றும் அரசலாற்றங்கரைகளில் ஏராளமானோர் காலை முதல் திரண்டுள்ளனர்.
இவர்கள் வாழை இலை போட்டு, விளக்கேற்றி வைத்து, வெற்றிலை, தேங்காய், பூ, வாழைப்பழம், கொய்யா, மா, பேரிக்காய், நாவற்பழம் உள்ளிட்ட பல்வகை பழங்களுடன், காதோலை கருகமணி, ஊறவைத்த அரிசியில் எள்ளு, வெல்லம் கலந்து வைத்தும், மஞ்சள் கயிறு, தாலிக்கயிறு, மஞ்சள், குங்குமம் வைத்து பூஜைகள் செய்தனர்.
இதன் மூலம் கன்னிப்பெண்கள் விரைவில் திருமணம் கைகூடவும், சுமங்கலிப் பெண்கள் குடும்ப மேன்மைக்காகவும், புதுமண தம்பதியினர் தங்களது திருமண மாலைகளை ஆற்றில் விட்டு, தாலி பெருக்கி அணிந்து கொண்டும் தீபங்கள் ஏற்றி வழிபட்டு உற்சாகமாக கொண்டாடி வருகின்றனர்.
இந்த பூஜையின் நிறைவாக, பெண்கள் ஒருவருக்கு ஒருவர் மஞ்சள் நூல்களை கழுத்தில் மாற்றி அணிவித்துக் கொண்டனர். அதேநேரம் ஆண்கள், தங்களது வலது கரங்களில் கயிறு கட்டிக் கொண்டனர். ஆற்றில் நீர் அதிகம் செல்வதால், முன்னச்சரிக்கை நடவடிக்கையாக காவல்துறையினர் பாதுகாப்பு பணியில் ஈடுபட்டுள்ளனர்.
இதையும் படிங்க: இந்துக்களும் இஸ்லாமியர்களும் இணைந்து நடத்தும் கந்தூரி திருவிழா
