தென்காசி: தென்காசி மாவட்டம் செங்கோட்டை அருகே உள்ள வல்லம் பிஸ்மி நாலாவது தெருவைச் சேர்ந்தவர் முகைதீன் அப்துல்காதர் (51). இவரது மகன் அபு என்ற முகம்மது சித்திக் (25). இவர், கடந்த 5-ஆம் தேதி தற்கொலை செய்து கொண்டு உயிரிழந்ததாகக் கூறப்பட்டது.
இதனை அடுத்து, தகவல் அறிந்த குற்றாலம் போலீசார் வழக்குப் பதிவு செய்து விசாரணை நடத்தி வந்தனர். முதற்கட்டமாக, உயிரிழந்த சித்திக்கின் கழுத்தில் காயங்கள் இருந்தது உடற்கூராய்வில் தெரிய வந்தது. இதனால் சந்தேகம் அடைந்த போலீசார் தங்களது விசாரணையைத் துரிதப்படுத்தினார்.
இந்த விசாரணையில் சித்திக்கின் பெற்றோர்கள் அவர்களது உறவினர் ஒருவரின் உதவியுடன் பெற்ற மகனைக் கொலை செய்தது அம்பலமானது. முகமது சித்திக் வேலைக்கு எதுவும் செல்லாமல் போதைக்கு அடிமையாகி குடும்பத்தில் உள்ளவர்களிடமும், உறவினர்களிடம் அடிக்கடி தகராறு செய்து வந்துள்ளார். சித்திக்கின் செயலை அவரது பெற்றோர் பலமுறை கண்டித்தும் அவர் தனது போக்கை மாற்றிக் கொள்ளவில்லை என்று கூறப்படுகிறது.
இதன் காரணமாக ஆத்திரத்தின் உச்சத்திற்குச் சென்ற முகம்மது சித்திக்கின் தந்தை முகைதீன் அப்துல்காதர் (51), தாய் செய்யது அலி பாத்திமா (39) மற்றும் பாத்திமாவின் சகோதரர் திவான் ஒலி (39) ஆகியோர் கடந்த 5-ஆம் தேதி துப்பட்டா ஒன்றினால் முகம்மது சித்திக்கின் கழுத்தை இறுக்கி கொலை செய்துள்ளனர்.
பின்னர் முகம்மது சித்திக் தற்கொலை செய்து கொண்டார் என்று நாடகமாடி குற்றாலம் காவல் நிலையத்தில் புகார் செய்து விஷயத்தை மூடி மறைக்க முயன்றுள்ளனர். ஆனால், சித்திக்கின் கழுத்தில் இருந்த காயம் உடற்கூராய்வில் தெரியவந்ததன் மூலம் முகம்மது சித்திக் தற்கொலை செய்து கொள்ளவில்லை என்றும் கொலை செய்யப்பட்டிருப்பதும் தெரியவந்துள்ளது.
போலீசார் தொடர்ந்து மேற்கொண்ட விசாரணையில் மகனுடன் ஏற்பட்ட தகராறில் பெற்றோரும், அவரது தாய் மாமனும் சேர்ந்து கொலை செய்ததை ஒப்புக்கொண்டனர். இதைத் தொடர்ந்து நேற்று (நவ. 08) இரவு மூன்று பேரையும் கைது செய்த போலீசார் அவர்களைச் சிறையில் அடைத்தனர்.
இந்த நிலையில், போதைக்கு அடிமையான மகனை, பெற்றோரே உறவினருடன் சேர்ந்து கொலை செய்த சம்பவம் தென்காசியில் மிகுந்த பரபரப்பு ஏற்படுத்தி உள்ளது.
இதையும் படிங்க: வெளிநாடுகளுக்கு கடத்த முயன்ற யானை தந்தங்கள்.. விருதுநகரில் மர்ம கும்பலை மடக்கி பிடித்த அதிகாரிகள்!
