ராமநாதபுரம் மாவட்டம், திருவாடானை பகுதியைச் சேர்ந்தவர் சரவணன். இவர் சென்னை உயர்நீதிமன்றத்தில் வழக்கறிஞராக பணியாற்றிவருகிறார்.
இவர் சிவகங்கை மக்களவைத் தேர்தலில் சிவகங்கை தொகுதியில் சுயேச்சையாக போட்டியிட வேட்புமனு அளித்திருந்த நிலையில், அவரது மனு தேர்தல் அதிகாரிகள் மூலம் ஏற்கப்பட்டு அவருக்கு தொப்பி சின்னமானது ஒதுக்கப்பட்டது.
இந்நிலையில், இவருடைய பவர் ஏஜெண்டாக உள்ள சதீஷ் என்பவர் தேர்தல் வேலை காரணமாக சிவகங்கை தாலுகா அலுவலகத்திற்கு கடந்த 1ஆம் தேதி வந்துவிட்டு சென்றபோது, அவரை கொல்லங்குடி அருகே வழிமறித்த மர்ம நபர்கள் சிலர் உங்கள் வேட்பாளர் தொப்பி சின்னத்திற்கு வாக்கு சேகரிக்கக் கூடாது என மிரட்டல் விடுத்ததாக கூறப்படுகிறது.
இதையடுத்து, தொப்பி சின்னத்தில் போட்டியிடும் சுயேச்சை வேட்பாளர் சரவணன் தனக்கு மக்கள் பிரதிநிதித்துவ சட்டத்தின் கீழ் வாக்கு சேகரிக்க பாதுகாப்பு வழங்கக்கோரி இன்று சிவகங்கை மாவட்ட தேர்தல் அதிகாரி ஜெயகாந்தனிடம் மனு அளித்தார்.
