கடந்த ஜனவரி 1ஆம் தேதி முதல் தமிழகம் முழுவதும் பிளாஸ்டிக் பொருட்களுக்குத் தடை செய்யப்பட்டு ஒரு முறை பயன்படுத்தப்படும் பிளாஸ்டிக் பைகளை அறவே ஒழிக்க அரசு கடுமையான நடவடிக்கை மேற்கொண்டு வருகிறது. இதன்படி வணிக வளாகங்கள், கடைகள், தொழில் நிறுவனங்கள் மற்றும் உணவகங்கள் போன்றவற்றில் அலுவலர்கள் திடீரென ஆய்வு செய்து பிளாஸ்டிக் பொருட்களை பறிமுதல் செய்து வருகின்றனர்.
இந்நிலையில் சேலம் பனமரத்துப்பட்டி அருகே உள்ள நிலவாரப்பட்டி பகுதியில் அனுமதியின்றி ப்ளாஸ்டிக் பைகள் தயாரிக்கும் நிறுவனம் ஒன்று செயல்பட்டு வருவதாக தமிழ்நாடு மாசுக்கட்டுப்பாட்டு வாரிய அதிகாரிகளுக்கு ரகசிய தகவல் கிடைத்தது. அதன்பேரில் அலுவலர்கள் சம்பந்தப்பட்ட இடத்தில் இன்று காலை அதிரடியாக சோதனை மேற்கொண்டனர்.
அப்போது வடமாநிலத்தை சேர்ந்த நேவிசன் என்பவர் தனியாக உள்ள வீடு ஒன்றின் மூன்றாவது மாடியில் பெரிய இயந்திரங்களை அமைத்து ஒரு முறை பயன்படுத்தப்படும் பிளாஸ்டிக் பைகள், பெரிய அளவிலான கேரிபேக் மற்றும் பல்வேறு பொருட்கள் தயாரிப்பது தெரியவந்தது.
இதனையடுத்து அங்கேயிருந்த 500 கிலோ பிளாஸ்டிக் பைகளை பறிமுதல் செய்ததோடு கேரி பேக் தயாரிக்க பயன்படுத்தப்பட்ட பெரிய அளவிலான ரோல்களையும் பறிமுதல் செய்தனர் .
இதுகுறித்து தொடர்ந்து விசாரணை மேற்கொண்ட போது சம்பந்தப்பட்டவர் வடமாநிலத்தை சார்ந்தவர் என்பதும் யாருக்கும் தெரியாத வகையில் நிலவாரப்பட்டி பகுதியில் , காலி இடத்தினை வாங்கி அதில், கட்டடம் கட்டி மூன்றாவது மாடியில் யாருக்கும் தெரியாத வகையில் இயந்திரங்களை அமைத்து பிளாஸ்டிக் பைகள் உற்பத்தி செய்யப்பட்டு வந்தது தெரியவந்தது.
இதனையடுத்து சம்பந்தப்பட்டவர் மீது மேல் நடவடிக்கை எடுக்க அரசுக்கு அலுவலர்கள் பரிந்துரை செய்தனர். மேலும் அந்த நிறுவனத்திற்கு வழங்கப்பட்டு வந்த மின் இணைப்பை துண்டிக்க அலுவலர்கள் நடவடிக்கை எடுத்தனர்.
இதையும் படிக்கலாமே: நிர்வாண கோலத்தில் காரில் கிடந்த காதலர்களின் சடலங்கள்..! மரணத்திற்கான காரணம் என்ன?
