சேலத்திலிருந்து சென்னைக்கு எட்டு வழிச்சாலை அமைக்க நிலம் கையகப்படுத்தும் பணிகள் கடந்த ஆண்டு நடந்தது. இதற்கு எதிர்ப்பு தெரிவித்து விவசாயிகள் வழக்கு தொடர்ந்து அதனடிப்படையில் இத்திட்டத்திற்கு தடைவிதித்து நீதிமன்றம் உத்தரவிட்டுள்ளது. இந்நிலையில், இத்திட்டத்தால் பாதிக்கப்படும் சேலம் மாவட்டத்தைச் சேர்ந்த 30க்கும் மேற்பட்ட விவசாயிகள் இன்று காலை சேலம் வடக்கு தொகுதி திமுக எம்எல்ஏ ராஜேந்திரனை சந்தித்து மனு ஒன்றை அளித்தனர்.
இதுகுறித்து 8 வழிச்சாலை எதிர்ப்பு கூட்டமைப்பின் சேலம் மாவட்ட செயலாளர் நாராயணன் கூறுகையில், "சேலம் - சென்னை எட்டு வழிச்சாலை திட்டம் கைவிடப்படும் என திமுக தலைவர் ஸ்டாலின் தேர்தல் அறிக்கையில் தெரிவித்திருந்தார். இத்திட்டத்தை திமுக தலைவர் ஸ்டாலினால் மட்டும்தான் நிறுத்த முடியும் என்ற நம்பிக்கை உள்ளது. தற்போது இந்த விவகாரம் தொடர்பாக சட்டப்பேரவையில் வலியுறுத்தவேண்டி திமுக எம்எல்ஏ ராஜேந்திரனிடம் மனு அளித்துள்ளோம்.
எட்டு வழிச்சாலை அமைக்கப்பட்டால் ஏராளமான மரங்கள் வெட்டப்பட்டு தண்ணீர் பஞ்சம் தான் அதிகரிக்கும். எனவே, விவசாய நிலங்கள் வழியாக இத்திட்டத்தை செயல்படுத்தாமல், ஏற்கனவே உள்ள பாதை வழியாக எட்டு வழிச்சாலை அமைக்க வேண்டும். இந்த விவகாரம் தொடர்பாக பாதிக்கப்படும் ஐந்து மாவட்ட விவசாயிகளும் ஒன்றிணைந்து திமுக தலைவர் ஸ்டாலினை நேரில் சந்தித்து வலியுறுத்த முடிவு செய்துள்ளோம்" என்றார்.
