ராமநாதபுரம் மாவட்டம் மேல பார்த்திபனூர் பரமக்குடி தாலுகாவில் உள்ள லீலாவதி நகரில் நூற்றுக்கணக்கான பழங்குடி காட்டுநாயக்கன் இனத்தைச் சேர்ந்த மக்கள் வசித்து வருகின்றனர். இவர்களுக்கு சாதிச் சான்றிதழ் வழங்காமல் கடந்த 10 ஆண்டுகளாக அரசு காலம்தாழ்த்தி வருவதாக குற்றம்சாட்டியுள்ளனர். சாதிச் சான்றிதழ் இல்லாமல் இச்சமூகத்தைச் சேர்ந்த மாணவர்கள் பள்ளிப் படிப்புடன் கல்வியை பாதியிலேயே நிறுத்த வேண்டிய சூழல் ஏற்பட்டுள்ளதாகவும் அம்மக்கள் கூறுகின்றனர்.
கடந்த 2011ஆம் ஆண்டு மானுடவியல் பேராசிரியர் மூலம் பழங்குடியின மக்கள் வாழும் கிராமங்களை ஆய்வு செய்து அந்த அறிக்கைகளின் அடிப்படையில் சாதிச் சான்றிதழ் வழங்கலாம் என்று தமிழ்நாடு அரசுக்கு உச்சநீதிமன்றம் உத்தரவிட்டிருந்தது.
இதன் அடிப்படையில் தென்மாவட்டங்களில் உள்ள பல மாவட்டங்களில் சாதிச் சான்றிதழ் வழங்கப்பட்ட நிலையில், ராமநாதபுரத்தில் சுமார் இரண்டாயிரத்திற்கும் மேற்பட்ட பழங்குடி இன மக்களுக்கு இதுவரை சாதிச் சான்றிதழ் வழங்கப்படாமல் உள்ளது. இந்த விவகாரத்தில் நடவடிக்கை எடுக்க வலியுறுத்தி பலமுறை மனுக்கள் அளித்ததோடு அலுவலர்களுடன் பேச்சுவார்த்தை நடத்தியும் தீர்வு காணப்படவில்லை.
இந்த நிலையில், இன்று ராமநாதபுரம் மாவட்ட ஆட்சியர் அலுவலத்தில் நடைபெற்ற குறைதீர் கூட்டத்துக்கு பாம்புகளுடன் பங்கேற்ற 50க்கும் மேற்பட்ட காட்டு நாயக்கர் மக்கள் உடுக்கை அடித்தவாறு அலுவலகத்தை முற்றுகையிட முயற்சித்தனர். பின்னர் போலீஸார் நடத்திய பேச்சுவார்த்தைக்குப் பிறகு மாவட்ட ஆட்சியர் வீர ராகவ ராவை சந்திக்க ஏற்பாடு செய்யப்பட்டது.
இது குறித்து உரிய ஆய்வு நடத்தி சாதிச் சான்றிதழ் வழங்க நடவடிக்கை எடுக்கப்படும் என்று மாவட்ட ஆட்சியர் உறுதி அளித்ததையடுத்து அங்கு வந்திருந்தவர்கள் கலைந்து சென்றனர்.
போராட்டத்திற்கு பாம்புகளுடன் ஆட்சியர் அலுவலகத்துக்கு பழங்குடி மக்கள் வந்ததால் சற்று நேரம் பரபரப்பு நிலவியது.
