ராமநாதபுரம் மாவட்டம் திருநகர் பகுதியை சேர்ந்தவர் மணிகண்டன் (38). இவர், தனது 15ஆவது வயதில் கிரிக்கெட் விளையாடியபோது ஏற்பட்ட விபத்தில் ஒரு கால் இழந்தார். அதன் பிறகு தன்னம்பிக்கையுடன் கல்லூரி படிப்பை முடித்த மணிகண்டன், சமூகத்தின் மீது கொண்ட அக்கறையால் தன்னால் முடிந்த உதவிகளை செய்து வந்துள்ளார். சமூகப் பணிகளில் ஈடுபட்டுவந்த மணிகண்டன், தனது ஒற்றைக்காலில் சைக்கிளை அழுத்தியபடி சிவகங்கை முதல் சென்னை வரை இரண்டு முறை பயணம் செய்து சாதனை படைத்துள்ளார்.
இரண்டு கால்கள் இருந்தும் உழைப்பை நம்பாமல் சோம்பேறியாய் வாழும் சிலருக்கு மணிகண்டன் உந்து சக்தியாய் இருப்பது அனைவரையும் நெகிழ வைத்துள்ளது. இந்நிலையில், காற்று மாசை கட்டுப்படுத்த விழிப்புணர்வு ஏற்படுத்த மணிகண்டன் விரும்பினார். அதன்படி கடந்த டிசம்பர் 13ஆம் தேதி கன்னியாகுமரியில் ஒற்றைக் கால் மூலம் சைக்கிள் பயணத்தை தொடங்கி தூத்துக்குடி, நெல்லை, மதுரை, கோவை, தருமபுரி, சேலம் வழியாக ஜனவரி 1ஆம் தேதி சென்னை மெரினா கடற்கரையில் உழைப்பாளர் சிலை முன் இந்த பயணத்தை நடிகர் விவேக் முடித்து வைத்தார்.
இதைத்தொடர்ந்து தமிழ்நாடு முதலமைச்சர், துணை முதலமைச்சரை நேரில் சந்தித்து வாழ்த்து பெற்றார். அதன் பிறகு மக்கள் நீதி மய்யம் தலைவர் கமல்ஹாசனை நேரில் சந்தித்து வாழ்த்து பெற்றார். இதையடுத்து, ராமநாதபுரம் திரும்பிய மணிகண்டனுக்கு பாரதி நகர் அருகே உள்ள அம்மா பூங்காவில் அவரது உறவினர்கள் மற்றும் நண்பர்கள் வரவேற்று கேக் வெட்டி பாராட்டினர்.
அதன்பின் செய்தியாளர்களிடம் மணிகண்டன் கூறுகையில், "கன்னியாகுமரி முதல் சென்னை வரையிலான காற்று மாசு குறித்த எனது பயணத்தை முடித்துள்ளேன். செல்லும் வழியெல்லாம் மக்களின் ஆதரவு அதிக அளவில் இருந்தது. பள்ளிகள் கல்லூரிகள் மற்றும் கிராமங்களில் மரம் வளர்ப்பின் முக்கியத்துவம் குறித்து எடுத்துரைத்தேன். இனிவரும் காலங்களில் இதுபோன்ற சமூக செயல்பாடுகளில் ஈடுபடுவேன்" என்றார்.
இதையும் படிங்க: தமிழ்நாட்டில் மறைகிறதா 'இரட்டை இலை’ மேஜிக்?
