'தானத்தில் சிறந்தது அன்னதானம்' என்போம். அந்த வகையில் வியாபார லாப நோக்கம் இன்றி இன்றைய காலகட்டத்திலும் ஆங்காங்கே சிலர் பலரது வயிற்றுப்பசிசை ஆற்றி வருகின்றனர். கோவையைச் சேர்ந்த கமலாத்தாள் பாட்டி ஒரு ரூபாய்க்கு இட்லி வழங்கி இன்று இந்திய அளவில் அறியப்படும் ஒரு நபராக மாறியிருக்கிறார். இவரது தன்னலமற்ற சேவைக்கு பல்வேறு தரப்பினரும் தலைவணங்கி உதவி வருகின்றனர்.
இவரைப் போன்றே ராமநாதபுரம் மாவட்டம் ராமேஸ்வரம் அக்னி தீர்த்தக் கடல் கரைக்கு எதிரே ராணி(70) என்ற மூதாட்டி பல ஆண்டுகளாக இட்லிக் கடை நடத்தி வருகிறார். இவரது பெற்றோரும் இதற்கு முன்பு இட்லிக் கடை நடத்தி வந்துள்ளனர். தனுஷ்கோடியை 1964இல் புயல் தாக்கிய போது இவர்களின் வீடு மொத்தமும் சூறையாடப்பட்டிருக்கிறது. பின் அங்கிருந்து இடம் பெயர்ந்து அகத்தியர் தீர்த்தத்தில் அரசு ஒதுக்கிய சுனாமி குடியிருப்பில் தங்கி, அக்னி தீர்த்தத்துக்கு அருகே தார்பாயில் சிறு கடை ஒன்றை அமைத்து கடந்த 36 ஆண்டுகளாக உணவகம் நடத்தி வருகிறார் ராணி பாட்டி.
இதுவும் சாதாரண இட்லிக் கடைதான் என்ற போதிலும், இங்கு வரும் ஆதரவற்றோர், முதியோர், மாற்றுத்திறனாளிகளுக்கு 35 ஆண்டுகளுக்கும் மேலாக இலவசமாக இட்லி பரிமாறி அவர்களது பசியாற்றி வருகிறார் இந்த மூதாட்டி. இது பாட்டி மக்கள் மீது கொண்டுள்ள அன்பையும், மனிதாபிமானத்தையும் காட்டும் செயலாக இருப்பதாக கடையில் உணவு அருந்த வரும் பிற வாடிக்கையாளர்கள் தெரிவிக்கின்றனர்.
ராணி பாட்டி இட்லிக் கடையில் ஒரு தட்டு இட்லி ரூ.30க்கு விற்கப்படுகிறது. இதில் 4 இட்லி, 1 வடை பரிமாறப்படுகிறது. சில நேரங்களில் பலர் உண்ட உணவுக்கு பணம் கொடுக்காமலும் சென்றுவிடுவதுண்டு.
இது குறித்து ஈ டிவி பாரத் ஊடகத்துக்கு ராணி பாட்டி அளித்த பேட்டியில், "கடந்த 36 ஆண்டுகளாக அக்னித் தீர்த்தக் கடல் கரை, முடி இறக்கும் நிலையம் அருகே கடை வைத்து நடத்தி வருகிறேன். என் பெற்றோர் 50 வருடங்களாக இட்லிக் கடை நடத்தி வந்தார்கள். எங்களது கடையில் ஏழைகள் வயதானவர்கள், ஊனமுற்றோருக்கு இலவசமாக உணவு கொடுத்து வருகிறேன். சில சமயங்களில் பணம் படைத்தவர்களே காசு கொடுக்கமாட்டாங்க. நானும் அதட்டிக் கேட்க மாட்டேன். பணம் கேட்டா நாளைக்கு வர மாட்டாங்களோனு நினைச்சு நானும் விட்டுருவேன். இந்த தார்பாய் கீழத்தான் கடை நடத்தி வர்றேன். அரசு உதவி பண்ணுனா தொடர்ந்து இந்த சேவையை செய்ய ஏதுவா இருக்கும்" என கருணையோடு பதிலளித்தார்.
இது போன்ற முதியவர்களிடம் மனிதமும், மனிதாபிமானும் எஞ்சியுள்ளதை உணரமுடிகிறது. மனிதம் காக்கும் செயல் அனைவரிடமும் பரவ வேண்டும். இந்த பாட்டியின் சிறு தேவையை அரசு பரிசீலனை செய்தால் அவர் மூலம் பலர் பசியாறுவர் என்பதில் எந்த சந்தேகமும் இல்லை...
