புதுக்கோட்டை மாவட்டம் கறம்பக்குடி செல்லும் சாலையில், "விபத்துப்பகுதி IPC 304(A) - அலட்சியத்தால் மரணம், 279 - அஜாக்கிரதையாக வண்டி ஓட்டி சேதத்தை ஏற்படுத்துதல், 337 - அலட்சியத்தால் விபத்து ஏற்பட்டு மற்றவருக்கு உயிர் சேதத்தை ஏற்படுத்துதல்" என இந்திய தண்டனைச் சட்டத்தை வெள்ளை பெயிண்ட் கொண்டு கறம்பக்குடி காவல்நிலைய அலுவலர்கள் எழுதியுள்ளனர்.
இதனால் மக்களிடையே ஒரு அச்சம் ஏற்பட்டு வாகனத்தை பாதுகாப்பாக இயக்குவார்கள் என்றும் விபத்துகள் குறையும் என்றும் காவலர்கள் தெரிவித்தனர். இதுகுறித்து விரிவாகப் பேசிய கறம்பக்குடி காவல் நிலைய அலுவலர் சரவணன், மக்கள் வாகனம் ஓட்டும்போது கவனமாக இருக்கவேண்டும் என்ற நோக்கத்தோடு இதை எழுதியுள்ளோம் என்றார்.
மேலும், இந்தச் சாலையில் அடிக்கடி விபத்துகள் நிகழ்ந்து வந்தன. விபத்துகளை குறைக்க பல்வேறு முயற்சிகள் எடுத்தும் பலனளிக்கவில்லை. சாலையில் இதுபோல் எழுதி வைப்போம் என ஒரு வாரத்திற்கு முன்பு முடிவு செய்து சாலையில் எழுதினோம்.
வாரத்திற்கு இரண்டு விபத்துகள் நிகழும் அந்தச் சாலையில், இதை எழுதிய பின்பு விபத்துகள் எதுவும் நடக்கவில்லை. இது மக்களிடம் நல்ல விழிப்புணர்வை ஏற்படுத்தியுள்ளது. சாலையைக் கடக்கும்போது இந்தச் சாலை மிகவும் மோசமான சாலை என்று அச்சம் கொண்டு வாகன ஓட்டிகள் மெதுவாக செல்கின்றனர். இதன் மூலம் விபத்துகள் தவிர்க்கப்படுகின்றன என்றார்.
இதையும் படிங்க: ஜனநாயக கடமையாற்றிய 102 வயது முதியவர்
