பெரம்பலூர் மாவட்டம் செஞ்சேரி கிராமத்தைச் சேர்ந்தவர் ராமர் (42). இவர் எலக்ட்ரீசியன் வேலை செய்துவருகிறார். இவர் நேற்றிரவு வேலை நிமித்தமாக செஞ்சேரியிலிருந்து குரும்பலூர் நோக்கி, தன்னுடைய இருசக்கர வாகனத்தில் சென்று கொண்டிருந்தார். குரும்பலூர் பாளையம் அருகேயுள்ள தனியார் பெட்ரோல் பங்கில் பெட்ரோல் போடுவதற்காக வலதுபுறம் திரும்பியுள்ளார்.
அப்போது அவருக்கு பின்னால் குரும்பலூர் நோக்கி இருசக்கர வாகனத்தில் வந்து கொண்டிருந்த பேரளி கிராமத்தைச் சேர்ந்த சதீஷ் (27) என்பவரின் வாகனம், ராமரின் வாகனம் மீது எதிர்பாராதவிதமாக மோதி விபத்துக்குள்ளானது. இந்த விபத்தில் ராமர் தலையில் பலத்தக் காயமடைந்து சம்பவ இடத்திலேயே உயிரிழந்தார்.
விபத்தில் லேசான காயங்களுடன் சதீஷ், அவருடைய மனைவி இந்த தம்பதியினரின் இரண்டு குழந்தைகள் உயிர்தப்பினர். இச்சம்பவம் குறித்து தகவலறிந்த பெரம்பலூர் நகர காவல் துறையினர் விரைந்துவந்து ராமரின் சடலத்தை கைப்பற்றி உடற்கூராய்வு பரிசோதனைக்காக பெரம்பலூர் அரசு மருத்துவமனைக்கு அனுப்பிவைத்தனர்.
இதனிடையே, இந்த விபத்து சம்பவம் பெட்ரோல் பங்கில் உள்ள சிசிடிவி கேமராவில் பதிவாகியுள்ளது. சிசிடிவி காட்சிகள் அடிப்படையில் பெரம்பலூர் காவல் துறையினர் விசாரணை மேற்கொண்டு வருகின்றனர்.
இதையும் படிங்க: சிசிடிவியில் சிக்கிய பைக் திருடன்!
