நாமக்கல்லில் அமமுக துணைத் தலைவர் திரு. அன்பழகன் இல்ல திருமண விழாவில் அமமுக பொதுச்செயலாளர் டிடிவி தினகரன் கலந்துகொண்டு மணமக்களை வாழ்த்தினார்.
இதன் பின்னர் அவர் செய்தியாளர்களை சந்தித்து பேசுகையில், "சசிகலா வெளியில் வந்தால் மாற்றம் வரும் என யாரும் சொல்லவில்லை. ஊடகங்கள்தான் தெரிவித்தன. கரோனா சிகிச்சைக்கு பின் மருத்துவர்கள் சசிகலாவை ஓய்வு எடுக்கச் சொன்னதால்தான் அவர் ஓய்வெடுத்து வருகிறார். ஓய்வு முடிந்த பிறகு வெளியே வருவார்.
திமுகதான் எங்களுக்கு தீய சக்தி, அரசியல் எதிரியான திமுக ஆட்சிக்கு வரக்கூடாது என்பதற்காக அம்மா மக்கள் முன்னேற்ற கழகம் தொடர்ந்து செயல்படும். எடப்பாடி பழனிசாமி ஆட்சி மீண்டும் வரும் என மக்கள் நினைக்கவில்லை.
தமிழ்நாடு முழுவதும் அமமுக வலுவாக உள்ளது. குறைவான தொண்டர்கள் உள்ளதாக பொய் பரப்புரை மேற்கொள்ளப்படுகிறது. தமிழ்நாட்டில் எங்களை மீறி அரசியலில் யாரும் எதையும் செய்துவிடமுடியாது.
அதிமுகவை அமமுக ஜனநாயக முறைப்படி மீட்டெடுக்கும். கட்சி தொடங்கியதிலிருந்தே இதனை கூறி வருகின்றோம். சசிகலா அதிமுகவை மீட்க சட்ட ரீதியாக போராடிவருகிறார். இதில் எந்த குழப்பமும் இல்லை. தமிழ்நாடு முதலமைச்சரின் நான்கு ஆண்டுகால ஆட்சிக்கு தேர்தலில் தமிழ்நாடு மக்கள் பதில் சொல்வார்கள்" என்றார்.
இதையும் படிங்க: சசிகலாவை சந்திக்க வாய்ப்பில்லை: அமைச்சர் வெல்லமண்டி நடராஜன் திட்டவட்டம்
