நாமக்கல் தொகுதி அதிமுக வேட்பாளர் காளியப்பனை ஆதரித்து தமிழ் மாநில காங்கிரஸ் கட்சியின் இளைஞர் அணி தலைவர் யுவராஜ் பரப்புரை மேற்கொண்டார். பின்னர் செய்தியாளர்களிடம் பேசிய அவர், "தமிழ் மாநில காங்கிரஸ் சார்பில் ஏப்ரல் 1-ஆம் தேதியில் தஞ்சாவூரில் தங்கள் கட்சி தலைவர் ஜி.கே வாசன் கட்சியின் தேர்தல் வாக்குறுதியை வெளியிட உள்ளோம். அந்த அறிக்கையில் தஞ்சை நெற்களஞ்சியம் பாதுகாக்கப்படும் என்றும் உறுதி மொழியை கொண்டதாக இருக்கும் " என்றார்.
தொடர்ந்து பேசிய அவர்," தங்கள் கட்சியின் தலைவர் உடன் சமீபத்தில் தமிழக முதல்வர் எடப்பாடி பழனிச்சாமி சந்தித்தபோது 8 வழி சாலை திட்டத்தை கைவிட வேண்டும் என்று கோரிக்கை வைத்தோம் அதற்கு தமிழக முதல்வர் விவசாயிகளை பாதிக்கும் எந்த திட்டமும் தமிழகத்தில் வராது என்று உறுதி அளித்தார். அதன் அடிப்படையிலேயே தான் தாங்கள் கூட்டணி வைத்துள்ளோம் " என தெரிவித்தார்.
மேலும், ஜெயலலிதாவின் மரணம் குறித்து நீதிமதி ஆறுமுகசாமி ஆணையம் தெளிவான விசாரணையை நடத்தி வரும் நிலையில், திமுக எம்மாதிரியான விசாரணை நடத்தப் போகிறது என கேள்வி எழுப்பினார். மொத்தத்தில் திமுக - காங்கிரஸ் கூட்டணி தமிழகத்தில் பொய் பரப்புரை செய்கின்றனர் என்று அவர் குற்றம்சாட்டினார்.
