தேனி மாவட்டம் போடியை சேர்ந்த பாண்டியன் என்பவர் மதுரை அமெரிக்கன் கல்லூரியில் பேராசிரியராக பணியாற்றிவருகிறார். இவருக்கு நித்திய கமலா என்ற மனைவியும், லத்திகா ஸ்ரீ (5) என்ற மகளும் உள்ளனர். லத்திகா ஸ்ரீ முதலாம் வகுப்பு படித்துவருகிறார். சில வருடங்களாக போடியில் வசித்துவந்த பாண்டியனின் மனைவி நித்திய கமலாவிற்கு நாமக்கல் அருகே உள்ள காட்டுப்புத்தூர் தனியார் பள்ளியில் ஆசிரியர் பணி கிடைத்ததையடுத்து, தம்பதி காட்டுப்புத்தூரில் வாடகை வீட்டில் குடிபெயர்ந்தனர். அவர்களின் மகள் லத்திகா ஸ்ரீயை, நித்திய கமலா பணியாற்றும் அதே பள்ளியில் சேர்த்தனர்.
இந்நிலையில், நேற்று (மே 20ஆம் தேதி) காலை லத்திகா ஸ்ரீ படிக்காமல் தொலைக்காட்சி பார்த்துக்கொண்டு இருந்ததால் கடுப்பான, நித்திய கமலா சமையல் குக்கர் பாத்திரத்தின் மூடியை எடுத்து லத்திகா ஸ்ரீயை தாக்கியதாகத் தெரிகிறது. இதைத்தொடர்ந்து, பள்ளியில் மாணவர்களுக்கு தரும் தண்டனையைப் போன்று பெற்ற மகள் என்றும் பாராமல் வெயிலில் நிற்க வைத்துள்ளார். வெயிலில் நின்ற லத்திகா ஸ்ரீ சோர்வில் மயக்கமடைந்த நிலையில் அவரது உடலில் இருந்து பல இடங்களில் ரத்தம் கசிந்துள்ளது.
இதனால் பதறிப்போன நித்திய கமலா, லத்திகா ஸ்ரீயை காட்டுப்புத்தூரில் தனியார் மருத்துவமனையில் சேர்த்தார். அவரை பரிசோதித்த மருத்துவர்கள் மேல் சிகிச்சைக்காக சேலம் மருத்துவமனைக்கு அனுப்பிவைத்தனர். ரத்தம் கசிந்த நிலையில் தீவிர சிகிச்சை பெற்றுவந்த லத்திகா ஸ்ரீ சிகிச்சை பலனின்றி உயிரிழந்தார்.
ஆசிரியர் பணியில் இருக்கும் தாய் அளித்த தண்டனையில் மகள் உயிரிழந்த சம்பவம் சம்பவம் அப்பகுதியில் பெரும் சோகத்தை ஏற்படுத்தியுள்ளது.
