நாகை மாவட்டம் கோதண்டராஜபுரம் கிராமத்தைச் சேர்ந்தவர் தென்கோவன். இவருக்கு வசந்தி என்ற மனைவியும், வசந்த கோவன், சாமுவேல் என்ற இரு மகன்களும் உள்ளனர். இந்நிலையில், இவர்கள் சில ஆண்டுகளுக்கு முன்பு கிறிஸ்தவ மதத்திற்கு மாறினர்.
இதற்கு எதிர்ப்பு தெரிவித்த கிராம மக்கள் அவர்களை ஊரை விட்டு ஒதுக்கி வைத்தும், வீட்டைக் காலி செய்ய கூறியும் வலியுறுத்தினர். இந்நிலையில் சனிக்கிழமை (ஜூன் 22ஆம் தேதி) தென் கோவன் ஊரில் இல்லாத போது, அவரது வீட்டிற்கு வந்த ஒரு அடையாளம் தெரியாத நபர்கள் வசந்தியையும், அவரது இரு மகன்களையும் தாக்கி வீட்டை காலி செய்யுமாறு கூறியுள்ளனர்.
இது குறித்து திட்டச்சேரி காவல்நிலையத்தில் வசந்தி புகார் அளித்தும் காவல்துறையினர் ஊர் மக்களுக்கு ஆதரவாக நடவடிக்கை எடுக்காமல் வசந்தியை தரக்குறைவாக திட்டியதாக கூறப்படுகிறது.
இதனால் மனவேதனை அடைந்த வசந்தி இன்று (ஜூன் 24ஆம் தேதி) தனது இருமகன்களுடன், மாவட்ட ஆட்சியர் அலுவலக வளாகத்தில் தனது மகன்கள் மீதும் அவரது உடல் மீதும் மண்ணெண்ணெயை ஊற்றிக் கொண்டு தீ வைத்துக் கொள்ள முயன்றார்.
அப்போது அங்கு பணியில் இருந்த காவலர்கள் அவர்களை தடுத்து நிறுத்தி விசாரணைக்காக நாகூர் காவல் நிலையத்திற்கு அழைத்துச் சென்றனர். இதனால் நாகை மாவட்ட ஆட்சியர் அலுவலக வளாகத்தில் சிறிது நேரம் பரபரப்பு ஏற்பட்டது.
