நாகப்பட்டினம்: ஒவ்வொரு ஆண்டும் ஜனவரி 1ஆம் தேதி ஆங்கிலப் புத்தாண்டு தினமாகக் கொண்டாடப்படுகிறது. அந்த வகையில், 2023ஆம் ஆண்டு நள்ளிரவுடன் முடிவடைந்து, 2024ஆம் ஆண்டு புத்தாண்டு வருகையை எதிர்பார்த்துக் காத்துக் கொண்டிருந்த மக்கள் நள்ளிரவில் புத்தாண்டு கொண்டாட்டத்தைத் துவங்கினர்.
ஆங்கிலப் புத்தாண்டை முன்னிட்டு நாகை மாவட்டம், வேளாங்கண்ணி புனித ஆரோக்கிய அன்னைப் பேராலயத்தில் நள்ளிரவு நடைபெற்ற சிறப்பு திருப்பலியில் 10 ஆயிரத்திற்கும் மேற்பட்டோர் பங்கேற்றனர். கீழை நாடுகளின் லூர்து என்று அழைக்கப்படும் வேளாங்கண்ணி புனித ஆரோக்கிய அன்னைப் பேராலயத்தில் ஆங்கிலப் புத்தாண்டையொட்டி, பேராலய வளாகத்தில் உள்ள புனித சேவியர் திடலில் சிறப்பு திருப்பலி நேற்றிரவு நடைபெற்றது.
தமிழ், ஆங்கிலம் உள்பட பல்வேறு மொழிகளில் திருப்பலி நிறைவேற்றுதல் உள்ளிட்ட வழிபாடுகள் நடைபெற்றன. தஞ்சாவூர் மறைமாவட்ட பரி பாலகர் எல்.சகாயராஜ் சிறப்புத் திருப்பலிகளை நிறைவேற்றி வைத்தார். தொடர்ந்து நள்ளிரவு 12.01 மணிக்கு 2024ஆம் ஆண்டு பிறப்பு அறிவிக்கப்பட்டது.
தஞ்சாவூர் மறைமாவட்ட பரி பாலகர் எல்.சகாயராஜ் மேடையில் வைக்கப்பட்டிருந்த குத்துவிளக்கை ஏற்றி புத்தாண்டு பிறந்ததை அறிவித்தார். பின்னர், பவனியாக எடுத்து வரப்பட்ட விவிலியம் மறைமாவட்ட ஆயரிடம் கொடுக்கப்பட்டது. புத்தாண்டை வரவேற்கும் விதமாக அங்குள்ள மக்களிடம் அதை உயர்த்தி காட்டினார்.
இதையடுத்து வழிபாட்டில் பங்கேற்றவர்கள் ஒருவருக்கொருவர் புத்தாண்டு வாழ்த்துகளைப் பரிமாறிக் கொண்டனர். புதிய ஆண்டை வரவேற்கும் விதமாக, வாண வேடிக்கைகள் நடைபெற்றன. பேராலயம், உபக்கோயில்கள், வளாகப் பகுதிகள் மற்றும் அலங்கார வளைவுகள் மின் விளக்குகளால் அலங்கரிக்கப்பட்டிருந்தன. பேராலயம், முக்கியச் சாலைகள், கடற்கரை பகுதிகளில் 300க்கும் மேற்பட்ட போலீசார் பாதுகாப்புப் பணியில் ஈடுபடுத்தப்பட்டிருந்தனர்.
இதையும் படிங்க: சென்னையில் களைகட்டிய '2024' புத்தாண்டு கொண்டாட்டம்!
