'96' படத்தை ஞாபகப்படுத்திய முன்னாள் மாணவர்கள்

நாகை: மயிலாடுதுறை ஏ.வி.சி. கல்லூரியில் படித்த முன்னாள் மாணவர்கள் 28 ஆண்டுகள் கழித்து மூன்றாவது முறையாக சந்தித்துக்கொண்ட நிகழ்ச்சி அனைவரையும் நெகிழ்ச்சியடைய வைத்துள்ளது.

நாகை மாவட்டம், மயிலாடுதுறை அருகே உள்ள மன்னம்பந்தல் ஏ.வி.சி. கல்லூரியில் 1987-90ஆம் கல்வி ஆண்டில் பயின்ற வணிகவியல் துறை முன்னாள் மாணவர்கள் சந்திப்பு நிகழ்ச்சி நடைபெற்றது. இந்த நிகழ்ச்சியில் 50-க்கும் மேற்பட்ட முன்னாள் மாணவர்கள் கலந்துகொண்டனர். கல்லூரி பருவம் முடிந்து ஒவ்வொரு மாணவனும் பல்வேறு நிலைகளை கடந்து திருமணம் செய்து பல்வேறு இடங்களில் தங்கள் குடும்பத்துடன் வசித்துவருகின்றனர்.

'96' படத்தில் தங்களது பள்ளி கால நண்பர்களை சந்தித்து பேசிக்கொள்வது போன்றே வாட்ஸ்அப் மூலம் தொடர்புகொண்டு 28 ஆண்டுகளுக்கு பிறகு மூன்றாவது முறையாக சந்தித்துக் கொண்டனர். இந்த சந்திப்பிற்காக குவைத், கத்தார், சிங்கப்பூர் உள்ளிட்ட வெளிநாடுகளில் இருந்து வருகை புரிந்துள்ள மாணவர்கள் தங்களது நண்பர்களை பார்த்த மகிழ்ச்சியை வார்த்தைகளால் விவரிக்க முடியாமல் ஆனந்தக் கண்ணீர் வடித்தனர்.

தங்களது பழைய நினைவுகளை பகிர்ந்துகொண்ட இவர்கள் ஒருவருக்கொருவர் கூடிப்பேசி, கவிதை வாசித்தல், பாடல்பாடுவது உள்ளிட்ட கேளிக்கை நிகழ்ச்சிகளில் பங்கேற்று, புகைப்படங்களை எடுத்துக்கொண்டனர். மேலும் தாங்கள் படித்த தேசிய மேல்நிலைப்பள்ளி கட்டடம் கட்டப்பட்டு வருவதாகவும், அதற்காக நிதி முன்னாள் மாணவர்களிடம் சேகரித்து வருவதாகவும் அவர்கள் தெரிவித்தனர்.