நாகை மாவட்டம் மயிலாடுதுறையை தலைமையிடமாகக் கொண்டு புதிய மாவட்டம் அமைக்க வேண்டும் என்ற அப்பகுதி மக்களின் கால் நூற்றாண்டு கோரிக்கை, கடந்த ஒரு மாதமாக மயிலாடுதுறை கோட்டத்தில் வலுத்துள்ளது. இதனை வலியுறுத்தி பல கிராமசபைக் கூட்டங்களில் தீர்மானம் நிறைவேற்றப்பட்டுள்ளது.
இந்நிலையில், தமிழக முதலமைச்சர் எடப்பாடி பழனிசாமி சுதந்திரதின விழா கூட்டத்தில் வேலூர் மாவட்டத்தைப் பிரித்து இரண்டு புதிய மாவட்டங்கள் அமைக்கப்படும் என்று அறிவித்தார். இதையடுத்து, மயிலாடுதுறையில் மாவட்ட அமைப்புக்குழுக் கூட்டத்தின் அவசர ஆலோசனைக் கூட்டம் ஒருங்கிணைப்பாளர் செந்தில்வேல் தலைமையில் நடைபெற்றது.
பின்னர் செய்தியாளர்களைச் சந்தித்த அவர், வேலூர் மாவட்டத்தைப் பிரித்து ஒரு வருவாய் கோட்டத்தை மாவட்டமாக அறிவித்தது போன்று உடனடியாக நாகையிலிருந்து மயிலாடுதுறை வருவாய் கோட்டத்தைப் பிரித்து புதிய மாவட்டமாக காந்தி ஜெயந்தி தினத்தில் அறிவிக்க வேண்டும் என தமிழக அரசுக்கு மாவட்ட அமைப்புக் குழு சார்பாக கோரிக்கைவிடுக்கப்பட்டுள்ளது என்றார்.
மேலும் கோரிக்கை ஏற்கப்படாவிட்டால், பேரணி, உண்ணாவிரதம், பாதயாத்திரை உள்ளிட்ட பல்வேறுகட்ட போராட்டங்களில் ஈடுபடப்போவதாக தெரிவித்தார்.
