நாகை மாவட்டம் மயிலாடுதுறை அருகே நல்லத்துக்குடி ஊராட்சியில் நான்காயிரத்திற்கும் அதிகமான மக்கள் வசித்துவருகின்றனர். அங்கு உடையார் குளம், அல்லிக்குளம், பாப்பாங்குளம், ஆண்டிக்குளம், அட்டக்குளம் உள்ளிட்ட ஏழு குளங்கள் அப்பகுதி மக்களுக்கு நீராதாரமாக இருந்து வருகின்றன.
இந்த குளங்களுக்குச் செல்லும் நீர் வழிப்பாதையான கண்ணிகள் தூர்வாரப்படாமல் இருப்பதால் எல்லா குளங்களுக்கும் தண்ணீர் போய் சேராமல் பல ஆண்டுகளாக வறண்ட நிலையில் காணப்படுகிறது. இதனால் தங்கள் பகுதியில் நிலத்தடி நீர்மட்டம் குறைந்து குடிநீர் பற்றாக்குறை ஏற்பட்டுள்ளதாகப் பொதுமக்கள் குற்றம்சாட்டினார்கள்
இதனையடுத்து நல்லத்துக்குடி பாசன வாய்க்காலை மட்டும் தூர்வாரிய ஊராட்சி நிர்வாகத்தினர் குளங்களுக்குச் செல்லும் கண்ணிகளைத் தூர்வாராததால் , இந்தாண்டும் குளங்களுக்கு தண்ணீர் போய் சேராமல் தண்ணீர் தட்டுப்பாடு ஏற்பட்டுள்ளது. எனவே உடனடியாக குளங்களுக்கு செல்லும் நீர் வழிப்பாதைகளைத் தூர்வாரி தண்ணீர் போய்ச் சேர நடவடிக்கை எடுக்க வேண்டும் என கிராம மக்கள் கோரிக்கை விடுத்துள்ளனர்.
