நாகப்பட்டினம்:
மத்திய அரசு அறிவித்துள்ள 'ஆரோக்கிய இந்தியா' திட்டத்தின்கீழ், செம்பனார்கோவில் ஒன்றியம் மேலப்பெரும்பள்ளம் ஊராட்சியில் சைக்கிள் பேரணி நடைபெற்றது. இப்பேரணியில் ஊராட்சி மன்ற உறுப்பினர்கள், கிராமவாசிகள், மகளிர் சுயஉதவிக்குழுவினர், மாணவர்கள் என திரளானோர் கலந்துகொண்டனர். மேலும், உடற்பயிற்சி மற்றும் உணவுக் கட்டுப்பாடு போன்றவற்றை வலியுறுத்தி சைக்கிளில் பதாகைகள் கட்டிச் சென்றனர்.
கன்னியாகுமரி:
கன்னியாகுமரி மாவட்டத்தில் அனைத்து கிராம ஊராட்சிகளிலும் 'ஆரோக்கிய இந்தியா' விழிப்புணர்வு பேரணி நடத்த மாவட்ட ஆட்சியர் பிரசாந்த் உத்தரவிட்டார். இதையடுத்து கரும்பாட்டூர், பஞ்சலிங்கபுரம், மகாராஜபுரம், சாமித்தோப்பு உள்ளிட்ட ஊராட்சிகளில் தலைவர்கள் சைக்கிள் ஓட்டி பேரணியைத் தொடங்கி வைத்தனர். இந்த சைக்கிள் பயணங்களில் திரளான பொதுமக்கள், ஊராட்சி உறுப்பினர்கள் கலந்து கொண்டனர்.
ராமநாதபுரம்:
ராமநாதபுரம் மாவட்டத்தில் ஃபிட் இந்தியா இயக்கத்தின் சார்பில் தொருவளூர் முதல் பேராவூர் வரையிலான 8️ கிலோமீட்டர் சைக்கிள் பேரணி நடைபெற்றது. இந்த பேரணியை ராமநாதபுரம் மாவட்ட ஆட்சியர் வீரராகவ ராவ், தொடக்கி வைத்து சைக்கிள் பேரணியில் கலந்து கொண்டார்.
திருவாரூர்:
திருவாரூரில் அம்மையப்பன் ஊராட்சி அலுவலகம் முன்பாக கொரடாச்சேரி ஒன்றிய துணை பெருந்தலைவர் பாலச்சந்திரன் தலைமையில், சைக்கிள் பேரணி நிகழ்ச்சி நடைபெற்றது. இப்பேரணியை திமுக மாவட்டச் செயலாளரும் சட்டமன்ற உறுப்பினருமான பூண்டி கலைவாணன் கொடியசைத்து தொடக்கி வைத்தார்.
கரூர்:
கரூரில் நேரு யுவகேந்திரா கணக்காளர் ஜெயப்பிரகாஷ், மாவட்ட சுற்றுச்சூழல் அலுவலர் ஜெரால்டு தலைமையில் 'ஆரோக்கிய இந்தியா' என்ற தலைப்பில் சைக்கிள் விழிப்புணர்வு பேரணி நடைபெற்றது. இதில் 15 வயது முதல் 25 வயது வரை உள்ள இளைஞர்கள் சுமார் 50க்கும் மேற்பட்டோர் கலந்து கொண்டு சிறப்பித்தனர்.
கள்ளக்குறிச்சி:
கள்ளக்குறிச்சியில் நடைபெற்ற ஃபிட் இந்தியா திட்டத்தின் சைக்கிள் பேரணியை மாவட்ட ஆட்சியர் கிரன்குராலா கொடியசைத்துத் தொடங்கி வைத்தார். மேலும், ஆட்சியர் மாணவர்களோடு இணைந்து சைக்கிளை ஓட்டிச் சென்று விழிப்புணர்வு ஏற்படுத்தினார்.
இதையும் படிங்க: கோவையில் விரைவில் தேசிய அளவிலான சைக்கிள் பந்தயம்
