நாகை மாவட்டம், மயிலாடுதுறை, ஆனந்த தாண்டவபுரம் சாலையில் நகராட்சிக்குச் சொந்தமான குப்பைக் கிடங்கு உள்ளது. நகராட்சிக்கு உட்பட்ட 36 வார்டுகளில் இருந்து அள்ளப்படும் குப்பைகள் இங்குதான் கொட்டப்படுகின்றன.
மக்கும் குப்பை, மக்காத குப்பை என தரம் பிரிக்கப்படுகிறது. குடியிருப்புப் பகுதியில் அமைந்துள்ள இக்குப்பைக் கிடங்கால் இப்பகுதி மக்களுக்கு சுகாதாரச் சீர்கேடு, தோல் நோய் உள்ளிட்ட தொற்று நோய்கள் ஏற்படுவதாக இப்பகுதி மக்கள் குற்றம்சாட்டி வருகின்றனர்.
இந்நிலையில் இக்கிடங்கில் உள்ள குப்பைகள் அடிக்கடி தீயிட்டுக் கொளுத்தப்படுகிறது. கடந்த ஐந்து நாட்களாக குப்பைகள் எரிந்து அதிலிருந்து வெளியே வரும் புகையினால் இப்பகுதி மக்கள் கடுமையான மூச்சுத் திணறல் மற்றும் கண் எரிச்சல் பிரச்னைகளுக்கு உள்ளாகியுள்ளனர்.
புகையால் குழந்தைகள் கடுமையான காய்ச்சல் உள்ளிட்ட நோய்களால் பாதிக்கப்பட்டுள்ளனர். இதுபோன்ற பல்வேறு இன்னல்களை ஏற்படுத்தும் குப்பைக் கிடங்கை இப்பகுதியில் இருந்து உடனடியாக அப்புறப்படுத்த வேண்டும் என்று மக்கள் கோரிக்கை விடுத்துள்ளனர்.
