'கர்நாடகா அமைச்சர் போல் காமராஜ் பேசுவது கண்டிக்கத்தக்கது!'

நாகை: கர்நாடகாவைச் சேர்ந்த அமைச்சர் போல்  காமராஜ் பேசுவதாகக் கடைமடை விவசாயிகள் கடும் கண்டனம் தெரிவித்துள்ளனர்.

காவிரியில் போதிய தண்ணீர் இல்லாததால், தமிழ்நாட்டிற்குத் தண்ணீர் திறந்துவிட இயலாது எனக் கர்நாடக அமைச்சர் சில தினங்களுக்கு முன் தெரிவித்திருந்தார். இந்நிலையில், தமிழ்நாடு உணவுத் துறை அமைச்சர் காமராஜிடம், ஜூன் 12இல் மேட்டூர் அணை திறக்கப்படுமா எனச் செய்தியாளர்கள் எழுப்பிய கேள்விக்கு, ஆண்டுதோறும் குறுவை சாகுபடிக்காக ஜூன் 12ஆம் தேதி மேட்டூர் அணையிலிருந்து தண்ணீர் திறப்பது வழக்கம் எனக் குறிப்பிட்ட அவர், இம்முறை கர்நாடகாவிலும் தண்ணீர் இல்லாததால் அம்மாநில அரசு தண்ணீர் திறக்க மறுத்துவருகிறது என்றார்.

கர்நாடக நீர்வளத் துறை அமைச்சர் சிவகுமார் கூறியதையே தமிழ்நாடு அமைச்சர் காமராஜுவும் கூறியிருப்பது விவசாயிகளிடையே பெரும் கலக்கத்தையும், கொந்தளிப்பையும் ஏற்படுத்தியுள்ளது.

மே மாதம் 28ஆம் தேதி டெல்லியில் கூடிய காவேரி மேலாண்மை ஆணையம், தமிழ்நாட்டிற்கு 9.2 டிஎம்சி தண்ணீரை வழங்க வேண்டும் என கர்நாடக அரசுக்கு உத்தரவு பிறப்பித்திருந்தது. இந்நிலையில், காவிரி நீரை நம்பி இந்த ஆண்டு நாகை மாவட்டத்தில் உள்ள ஒரு லட்சத்துக்கும் மேற்பட்ட விவசாயிகள் குறுவை சாகுபடிக்குத் தயாராகிவந்தனர்.

இதனிடையே கர்நாடகாவிடம் இருந்து தண்ணீரைப் பெற்றுத்தர வேண்டிய அமைச்சர் காமராஜ், கர்நாடக அணைகளில் போதிய தண்ணீர் இருப்பு இல்லை கூறியிருப்பது பெரும் பொதுமக்களிடையேயும், விவசாயிகளிடையேயும் கவலையை ஏற்படுத்தியுள்ளது.

இது தொடர்பாகப் பேட்டியளித்துள்ள கடைமடை விவசாயிகள் சங்கத் தலைவர் தமிழ்செல்வன், "அமைச்சரின் பேச்சு டெல்டா மாவட்ட கடைமடைப் பகுதி விவசாயிகள் மத்தியில் பெரும் கலக்கத்தை, கொந்தளிப்பையும் அடையச் செய்துள்ளது. இந்த ஆண்டு குறுவை சாகுபடிக்கு போதிய தண்ணீர் கிடைக்குமா என்ற ஐயம் எழுந்துள்ளது.

எனவே, அமைச்சரின் இந்த கருத்தை மாற்றிக்கொண்டு விவசாயிகளின் வாழ்வாதாரம் கருதி, காவிரி மேலாண்மை ஆணையம் அறிவித்துள்ள நீரை கர்நாடக அரசிடமிருந்து பெற்றுத் தர மாநில அரசு முனைப்புக் காட்டுவதுடன் நில்லாமல் மேலாண்மை ஆணையம் குழுவிற்கு உரிய அழுத்தம் தர வேண்டும் எனக் கடைமடைப் பகுதி விவசாயிகள் கோரிக்கை விடுக்கிறது" என்று அவர் தெரிவித்தார்.