மாண்டஸ் புயல் - மயிலாடுதுறை மாவட்டத்தில் கடல் சீற்றம்

மாண்டஸ் புயல் தாக்கம் காரணமாக மயிலாடுதுறை மாவட்டத்தில் கடல் சீற்றம் ஏற்பட்டுள்ளது. இதன் காரணமாக, மீன்பிடித் தொழிலுக்குச் செல்லாமல் படகுகளை கடற்கரையில் பாதுகாப்பாக நிறுத்தி வைத்துள்ள மீனவர்கள் வாழ்வாதாரம் இழந்து தவிப்பதாக வேதனைத் தெரிவித்துள்ளனர்.

மயிலாடுதுறை: வங்கக் கடலில் உருவாகியுள்ள மாண்டஸ் புயல் தீவிரமடைந்து வரும் நிலையில் தமிழ்நாட்டிலுள்ள கடலோர மாவட்டங்களில் கடல் சீற்றத்துடன் காணப்படும் என வானிலை ஆய்வு மையம் அறிவித்துள்ளது. அதனைத் தொடர்ந்து மயிலாடுதுறை மாவட்டத்தின் இரண்டு நாள்களாக வானம் மேகமூட்டத்துடன் இருந்த நிலையில் கடல் அலைகள் வேகமாக கொந்தளிப்பு சீற்றத்துடன் காணப்படுகிறது.

மேலும், மீனவர்கள் யாரும் கடலுக்குச் செல்ல வேண்டாம் என்று மீன்வளத்துறை சார்பில் அறிவிப்பு விடுக்கப்பட்டிருந்தது. இதனால் மயிலாடுதுறை மாவட்டத்திலுள்ள தரங்கம்பாடி, சின்னங்குடி, பூம்புகார், வானகிரி, சந்திரபாடி, மாணிக்கப்பங்கு, குட்டியாண்டியூர், பழையார், திருமுல்லைவாசல் உள்ளிட்ட 28 மீனவ கிராமங்களைச் சேர்ந்த 30 ஆயிரம் மீனவர்கள் மீன்பிடிக்க கடலுக்குச் செல்லாமலும் தங்களது உடைமைகளையும், பைபர் படகுகள், விசைப் படகுகளையும் கடற்கரையில் பாதுகாப்பாக நிறுத்தி வைத்துள்ளனர்.

கடந்த மாதம் பெய்த அதீத கனமழையால் கடலுக்குச் செல்லாமல் வாழ்வாதாரம் இழந்து கடுமையாக பாதிக்கப்பட்டதாகவும், தற்போது மாண்டஸ் புயலால் கடலுக்குச் செல்லாமல் மீண்டும் வாழ்வாதாரம் இழந்து தவிப்பதாகவும் மீனவர்கள் கவலைத் தெரிவித்துள்ளனர்.

மீனவ குடும்பங்களுக்கு தமிழ்நாடு அரசு உரிய நிவாரணம் வழங்க வேண்டும் எனவும்; விவசாயிகளைப் பாதுகாக்க கூட்டுறவு வங்கிகள் உள்ளதைப்போல மீனவ மக்களுக்கும் கூட்டுறவு வங்கிகளைத் தொடங்க வேண்டும் என்றும் கோரிக்கை விடுத்துள்ளனர்.

இதையும் படிங்க: 'மாண்டஸ்' புயல் முன்னெச்சரிக்கை; இன்று இரவு எங்கெங்கு பஸ் இயங்காது தெரியுமா?