மதுரை: மதுரை வளர்நகர் அருகே ராஜீவ்காந்தி நகர் பகுதியில் கடந்த 22ஆம் தேதி உலகனேரியை சேர்ந்த பாலமுருகன் என்ற டோராபாலா கொலை செய்யப்பட்டார். இது தொடர்பாக மாட்டுத்தாவணி காவல்துறையினர் வழக்குப்பதிவு செய்து தீவிர விசாரணை நடத்தி வந்தனர். இந்த கொலை வழக்கு தொடர்பாக வினோத், மாரி, விஜயராகவன், சூர்யா, ஜெகதீஸ்வரன் ஆகிய 5 பேரை கைது செய்து காவல்துறையினர் விசாரணை நடத்தி வருகின்றனர்.
இதில் முதல் குற்றவாளியாக, பல்வேறு குற்ற சம்பவங்களில் தொடர்புடைய பிரபல ரவுடியான வண்டியூரைச் சேர்ந்த வினோத் என்பவர் கைது செய்யப்பட்டு கொலை சம்பவம் நடைபெற்ற பகுதி மற்றும் பதுங்கியிருந்த பகுதிகள் குறித்து அடையாளம் காட்டுவதற்காக இன்று (பிப்.28) காலை போலீசாரால் அழைத்து செல்லப்பட்டார்.
அதன்படி, மதுரை வண்டியூர் பகுதிக்கு வினோத்தை காவல்துறையினர் அழைத்துச் சென்று அடையாளம் காட்டியபோது திடீரென அங்கு அவர் பதுக்கிவைத்திருந்த அரிவாளால் முதல்நிலை காவலரை வெட்ட முயன்றுள்ளார். அப்போது அங்கு பணியில் இருந்த ஆய்வாளர், ரவுடி வினோத்தின் காலில் துப்பாக்கி சூடு நடத்தி அவரைப் பிடித்தார்.
இதனையடுத்து காயமடைந்த ரவுடி வினோத்தை அரசு ராஜாஜி மருத்துவமனையில் சிகிச்சைக்காக போலீசார் அனுமதித்துள்ளனர். இவ்வாறு காவல்துறையினரை வெட்ட முயன்ற ரவுடியை போலீசார் துப்பாக்கியால சுட்டு பிடித்த சம்பவம் மதுரையில் பெரும் பரபரப்பை ஏற்படுத்தியுள்ளது.
இதையும் படிங்க: நகைக்கடை கொள்ளை வழக்கு: துப்பு கிடைக்காமல் திணறுகிறதா போலீஸ்?
