மதுரை: உலகப்புகழ் பெற்ற மதுரை மீனாட்சி அம்மன் கோயிலுக்கு சொந்தமான பார்வதி என்ற 26 வயது பெண் யானைக்கு, கடந்த 2021ஆம் ஆண்டு முதல் இரு கண்களிலும் கண் புரை நோய் பாதிப்பு ஏற்பட்டது. இதுதொடர்பாக அளிக்கப்பட்ட சிகிச்சையில் எந்தவித முன்னேற்றமும் இல்லாததால், தாய்லாந்தில் இருந்து வரவழைக்கப்பட்ட சிறப்பு மருத்துவக் குழுவினர் சிகிச்சை அளித்தனர்.
மேலும் பார்வதி யானைக்கு கண்களில் உள்ள புரைநோய்க்கு காலை, மாலை என இரண்டு வேளையிலும் மருந்துகள் செலுத்தப்பட்டு வருகின்றன. இதனிடையே மதுரையைச் சேர்ந்த சமூக ஆர்வலர் மருதுபாண்டி, தகவல் அறியும் உரிமைச் சட்டத்தின் மூலம் மதுரை மீனாட்சி அம்மன் கோயில் பார்வதி யானைக்கு அளிக்கப்பட்டு வரும் சிகிச்சை குறித்தும், மருத்துவ அறிக்கையும் கேட்டிருந்தார்.
இதுதொடர்பாக மதுரை மீனாட்சி அம்மன் கோயில் நிர்வாகம் அளித்துள்ள பதிலில், “மீனாட்சி அம்மன் கோயில் பார்வதி யானையின் கண்களில் இருந்து நீர் வடிவது நின்றுள்ளது. தாய்லாந்து மருத்துவர்களின் பரிந்துரையின் பேரில் யானை குளிப்பதற்கு முன், குளிப்பதற்கு பின் எனத் தொடர்ந்து சொட்டு மருந்துகள் அளிக்கப்பட்டு வருகின்றன.
படிப்படியாக பார்வதி யானையின் உடல் நிலையில் முன்னேற்றம் ஏற்பட்டுள்ளது. மேலும் சென்னையில் உள்ள தமிழ்நாடு கால்நடை பல்கலைக்கழகத்தின் பேராசிரியர் ரமணி மற்றும் மதுரை மாவட்ட கால்நடை மருத்துவக் குழுவினர் தொடர்ந்து யானைக்கு சிகிச்சை அளித்து வருகின்றனர் என தெரிவிக்கப்பட்டுள்ளது.
இதையும் படிங்க: மதுரை கோயில் யானை மருத்துவத்திற்கு இவ்வளவு செலவா? ; ஆர்டிஐ தகவல்
