ராமநாதபுரம் மாவட்டம் சக்கரக்கோட்டை பகுதியைச் சேர்ந்த நாகேஸ்வரன் என்பவர் சென்னை உயர் நீதிமன்ற மதுரைக்கிளையில் மனு ஒன்றை தாக்கல் செய்திருந்தார்.
அந்த மனுவில், "பெரியாரின் 141ஆவது பிறந்தநாள் விழாவில், பெரியார் உணர்வாளர்களின் கூட்டமைப்பு சார்பில் 'திருவள்ளுவரின் 2050 ஆண்டின் அடைவுகள்' என்ற நூல் வெளியிடப்பட்டது.
இந்த நூல் அறிமுக விழா, திருக்குறள் மாநாடு, கலாசார நிகழ்வு ஆகியவை ராமநாதபுரத்தில் உள்ள அரண்மனை வாசலில் பெரியார் உணர்வாளர்களின் கூட்டமைப்பு சார்பில் டிசம்பர் 14ஆம் தேதி நடத்த திட்டமிட்டுள்ளோம். இதில் தந்தை பெரியார் பேரவை தலைவர் நாகேஸ்வரன், மே பதினேழு இயக்கத்தின் ஒருங்கிணைப்பாளர் திருமுருகன் காந்தி, திராவிடர் விடுதலைக் கழகத்தின் தலைவர் கொளத்தூர் மணி உள்ளிட்டோர் பங்கேற்கின்றனர்.
இந்தப் பொதுக்கூட்டத்திற்கும் பேரணிக்கும் அனுமதி கோரி ராமநாதபுரம் காவல் துணை கண்காணிப்பாளர் மற்றும் ராமநாதபுரம் நகர் காவல் ஆய்வாளர் ஆகியோரிடம் மனு அளித்தும் இதுவரை எந்தப் பதிலும் அளிக்கவில்லை. எனவே கூட்டத்திற்கும் பேரணிக்கும் அனுமதி வழங்க உரிய உத்தரவு பிறப்பிக்க வேண்டும். காவல் துறை பாதுகாப்பு வழங்க உத்தரவிட வேண்டும்" என்று குறிப்பிட்டிருந்தார்.
இந்த மனு நீதிபதி ஜெகதீஸ் சந்திரா, முன் விசாரணைக்கு வந்தது. அப்போது அரசு தரப்பில் ஆஜரான வழக்கறிஞர், பொதுக்கூட்டம், பேரணி, புத்தக வெளியீட்டு விழா என்று பல்வேறு நிகழ்வுகள் நடக்கவுள்ளது. இதனால்தான் காலதாமதம் ஆகிறது எனக் கூறினார்.
கூட்டத்திற்கு ஏன் அனுமதி வழங்கவில்லை என்பது குறித்து, ராமநாதபுரம் காவல் துணை கண்காணிப்பாளர் பதில் மனு தாக்கல் செய்ய உத்தரவிட்டு வழக்கு விசாரணையை டிசம்பர் 10ஆம் தேதி ஒத்திவைத்து உத்தரவிட்டார்.
இதையும் படிங்க: சங்கு சமுத்திர கண்மாயில் மணல் அள்ள தடை: சிவகங்கை ஆட்சியர் பதிலளிக்க உத்தரவு!
