மதுரை மத்திய சிறையில் கைதிகள் சிலரோடு சிறைக்காவலர்கள் நெருக்கமாக இருப்பதால் சிறையில் கஞ்சா உள்ளிட்ட போதைப்பொருட்கள் பயன்படுத்துவதாக அடிக்கடி புகார்கள் எழுந்துவருகின்றன.
இந்நிலையில், மதுரை மத்திய சிறையின் உதவி சிறை வார்டன் முனியாண்டி, முதல்நிலை சிறை காவலர்கள் எம்.ஜி. மணி, மூர்த்தி ஆகிய மூவரும் கோச்சடை பகுதியிலுள்ள தனியார் நட்சத்திர விடுதியில் பிணைக்கைதி முத்துகிருஷ்ணனுடன் ஒன்றாக மது அருந்தியதாக சில நாட்களுக்கு முன்பு புகார் எழுந்தது.
இது குறித்து, சிறை கண்காணிப்பாளர் ஊர்மிளா தலைமையில் விசாரணை நடத்தப்பட்டதில் மூவர் மீதான புகார் நிரூபிக்கப்பட்டது. இதையடுத்து, உதவி சிறை வார்டனையும் சிறைக் காவலர்களையும் பணியிடை நீக்கம் செய்ய ஊர்மிளா உத்தரவிட்டுள்ளார்.
இதேபோன்று முறைகேடுகளில் ஈடுபட்டு கைதிகளுக்கு ஆதரவாக செயல்படும் சிறைத் துறை அலுவலர்கள் மீது நடவடிக்கை எடுக்க வேண்டும் என சமூக செயற்பாட்டாளர்கள் கோரிக்கைவிடுத்துள்ளனர்.
