மதுரை: மதுரையைச் சேர்ந்த ஹசீனா பேகம் என்பவர் உயர்நீதிமன்ற மதுரை கிளைகள் மனுவினை தாக்கல் செய்திருந்தார். அதில் "எனது கணவர் ஜின்னா கோரிப்பாளையம் பகுதியில் மொபைல் கடை நடத்தி வருகிறார். மத்திய புலனாய்வு அமைப்பிடமிருந்து எனது கணவரை விசாரிக்க வேண்டும் என மதுரை மத்திய புலனாய்வு அலுவலகத்திற்கு வரும்படி தெரிவித்தனர்.
அதன் அடிப்படையில் எனது கணவர் விசாரணைக்கு சென்ற போது மத்திய புலனாய்வு அதிகாரிகளும், மாவட்ட துணை காவல்துறை கண்காணிப்பாளர் செந்தில்குமார் ஆகியோர் எனது கணவருக்கும் பாப்புலர் ஃப்ரண்ட்ஸ் ஆஃப் இந்தியா நிறுவனத்திற்கும் தொடர்பு இருப்பதாக கூறி கடுமையாக தாக்கி சித்திரவதை செய்துள்ளனர். இதனால் எனது கணவர் பலத்த காயமடைந்து மருத்துவமனையில் அனுமதிக்கப்பட்டார்.
எனது கணவரின் தொலைபேசியில் இருந்து வந்த அழைப்பை ஏற்று மருத்துவமனையில் சென்று பார்த்த போது, எனது கணவர் பயங்கர காயங்களுடன் காணப்பட்டார். அவரிடம் விசாரித்த போது மத்திய புலனாய்வு அதிகாரிகள், மற்றும் டிஎஸ்பி செந்தில்குமார் ஆகியோர் விசாரணையில் தங்களை கடுமையாக தாக்கியதாக தெரிவித்தார். மருத்துவமனை நிர்வாகத்திடம் கேட்ட போது எனது கணவர் விபத்து ஏற்பட்டு அனுமதிக்கப்பட்டதாக கூறுகின்றனர்.
இந்த சம்பவம் தொடர்பாக மத்திய புலனாய்வு அதிகாரிகள் மீது புகார் கொடுத்துள்ளேன். மேலும் மனித உரிமை ஆணையத்திலும் எனது கணவர் தாக்கப்பட்டது குறித்து புகார் கொடுத்துள்ளேன். எனது கணவர் மருத்துவமனையில் அனுமதிக்கப்பட்ட போது அவசர சிகிச்சை பிரிவில் இருக்கக்கூடிய சிசிடிவி வீடியோ பதிவுகளை பாதுகாத்து வைக்கவும் அதனை தங்களிடம் ஒப்படைக்க வேண்டும் என மனுவில் குறிப்பிட்டிருந்தார்
இந்த வழக்கு மதுரை உயர்நீதிமன்ற கிளை நீதிபதி சிவி கார்த்திகேயன் முன்பாக விசாரணைக்கு வந்தது. அப்போது நீதிபதி சிசிடிவி காட்சிகளை பதிவுகள் எத்தனை நாட்கள் பாதுகாத்து வைக்க முடியும் என்பது தொடர்பாக மதுரை அரசு ராஜாஜி மருத்துவமனை டீன் பதில் அளிக்க உத்தரவிட்டும், அதே போல் மனுதாரர் மத்திய புலனாய்வு அமைப்பை எதிர் மனுதாரராக சேர்க்கவும் உத்தரவிட்டு வழக்கு விசாரணையை ஒத்திவைத்தார்.
இதையும் படிங்க: வேங்கைவயல் குடிநீர்த்தொட்டி வழக்கில் எந்த விசாரணை அமைப்பும் நடவடிக்கை எடுக்காது - வேதனைத் தெரிவித்த நீதிபதிகள்
