மதுரை: மதுரை மாவட்ட ஆட்சியர் அலுவலகத்தின் அருகே உள்ளது, பழைய ராமநாதபுரம் ஆட்சியர் அலுவலகக் கட்டடம். இங்கு நில அளவைத்துறை மண்டல இணை இயக்குநர் அலுவலகம் உள்ளிட்ட பல்வேறு அரசு அலுவலகங்கள் இயங்கி வருகின்றன. இந்த நிலையில், அங்குள்ள இருசக்கர வாகன நிறுத்துமிடத்தை ஒருவர், மது அருந்தும் கூடாரமாக மாற்றி, அலுவலக நேரத்திலேயே மது குடித்துவிட்டு, அங்கேயே மது பாட்டிலை உடைத்துப் போடும் வீடியோ ஒன்று சமூக வலைத்தளங்களில் வைரலாகி வருகிறது.
இது குறித்து சமூக ஆர்வலர் ஒருவர் கூறுகையில், "அரசு அலுவலக வளாகத்தில் ஒருவர் மது அருந்தக்கூடிய வீடியோ சமூக வலைத்தளங்களில் வைரலாகி வருகிறது. அரசு நடத்தை விதிகளின் அடிப்படையில், அரசு அலுவலக வளாகத்தில் மது அருந்துவதோ, போதைப் பொருட்கள் பயன்படுத்துவதோ தவறு. இந்த வீடியோவில் ஒருவர் தன்னை அரசு அலுவலர் என்று குறிப்பிடுகிறார். பணி நேரத்தில் மது அருந்துகிறார். அதுமட்டுமன்றி அந்த பாட்டிலை அங்கேயே போட்டு உடைக்கிறார்.
அரசு அலுவலக வளாகத்தைக் கண்காணிக்கக்கூடிய அலுவலர்கள் என்ன செய்கிறார்கள்? பொதுமக்களில் சிலரும் இதுபோன்று அவ்விடத்தில் மது அருந்த முயன்றால், அரசு அனுமதிக்குமா? இதுபோன்ற அலுவலக வளாகத்தில் அரசு ஊழியரே மது அருந்தினால், பொதுமக்களுக்கும் அந்தத் துணிச்சலை ஏற்படுத்திவிடாதா? இதனால் சட்டம் ஒழுங்கு சிக்கல்கள் ஏற்பட வாய்ப்பு உருவாகாதா?" எனக் கேள்விகளை எழுப்பினார்.
தொடர்ந்து பேசிய அவர், "ஒரு அரசு அலுவலர் எவ்வாறு நடந்து கொள்ள வேண்டும் என்பது குறித்து நடத்தை விதிகள் மிக தெளிவாக உள்ளன. ஆனால், சம்பந்தப்பட்ட வீடியோவில் இருப்பவர் சம்பந்தப்பட்ட அரசு அலுவலரா? அல்லது பொதுமக்களில் ஒருவரா? என்பது எனக்கு தெரியாது.
யாராக இருந்தாலும் அரசு அலுவலக வளாகத்தில் போதைப் பொருட்களைப் பயன்படுத்துவது தவறு. ஆகையால், மாவட்ட நிர்வாகம் அவரை யார்? என்று கண்டறிந்து அவர் மீது வழக்குப் பதிவு செய்து தக்க நடவடிக்கை எடுக்க வேண்டும்" என அரசுக்கு கோரிக்கை விடுத்துள்ளார்.
இந்நிலையில், அரசு அலுவலர் எனக் கூறிக்கொண்டு மதுரை மாவட்ட ஆட்சியர் அலுவலகத்தில் மது அருந்திய நபரின் வீடியோ சமூக வலைத்தளங்களில் வைரலாகி வருகிறது. இதைத்தொடர்ந்து, சம்பந்தப்பட்டவர் அரசு ஊழியரோ? இல்லை பொதுமக்களுள் ஒருவரோ? அவர் யாராக இருப்பினும் அரசு அவர் மீது தக்க நடவடிக்கை எடுக்க வேண்டும் என பலத்தரப்பினரும் கோரிக்கை விடுத்துள்ளனர்.
இதையும் படிங்க: அன்னபூரணி திரைப்படம் விவகாரம்; மன்னிப்பு கோரிய நயன்தாரா..!
