கரூர்: புகழூர் குப்பம் கிராமத்தில் நியூ ஸ்டார் புளு மெட்டல் மற்றும் P. அமராவதி கல்குவாரி அமைப்பதற்கு பொதுமக்கள் கருத்து கேட்புக் கூட்டம் கரூர் மாவட்ட வருவாய் அலுவலர் கண்ணன் தலைமையில் குப்பம் பகுதியில் உள்ள திருமுருகன் திருமண மண்டபத்தில் நேற்று நடைபெற்றது.
இக்கூட்டத்தில், தமிழ்நாடு சுற்றுச்சூழல் பாதுகாப்பு இயக்கத்தின் ஒருங்கிணைப்பாளர் முகிலன், காவிரி ஆறு பாதுகாப்பு இயக்கத்தின் ஒருங்கிணைப்பாளர்கள் விஜயன், சண்முகம் உள்ளிட்ட சுற்றுச்சூழல் ஆர்வலர்கள், கல்குவாரி அமைக்கப்படுவதால் சுற்றுச்சூழல் பாதிப்பு ஏற்படும் என கருத்துகளை பதிவு செய்தனர். இதேபோல, குப்பம் கிராமத்தைச் சேர்ந்த பொதுமக்கள் சிலரும் கல்குவாரி அமைப்பதற்கு எதிர்ப்பு தெரிவித்து, கருத்துகளை பதிவு செய்தனர்.
பின், தமிழ்நாடு சுற்றுச்சூழல் பாதுகாப்பு இயக்கத்தின் ஒருங்கிணைப்பாளர் முகிலன் செய்தியாளர்களைச் சந்தித்து கூறுகையில், ‘கரூர் மாவட்டத்தில் அமலாக்கத்துறை அதிகாரிகள் மணல் குவாரிகளில் முதல் கட்டமாக சட்ட விதிமுறை மீறல்கள் நடைபெற்றதைக் கண்டறிந்து சோதனை மேற்கொண்டு உள்ளனர். மிக விரைவில் கரூர் மாவட்டத்தில் உள்ள நூற்றுக்கணக்கான கல்குவாரிகளில் சட்ட விதிமுறைகளை மீறி கனிம வளங்கள் கொள்ளை, கல்குவாரி விதிமுறை மீறல்கள் குறித்து ஆய்வு நடத்த இருக்கிறார்கள்.
கனிம வளக் கொள்ளை குறித்து கரூர் மாவட்ட ஆட்சியர் பிரபு சங்கர் மற்றும் கரூர் மாவட்ட காவல் கண்காணிப்பாளர் சுந்தரவதனம் ஆகியோரிடம் அளிக்கப்பட்ட புகார்கள் விசாரிக்கப்படவில்லை. மாறாக , கனிமவள கொள்ளையர்களுக்கு துணை போகும் வகையில் இருவரும் செயல்பட்டனர்.
தமிழக அரசு பல்வேறு மாவட்டங்களில் மாவட்ட ஆட்சியர்களையும் மாற்றி அமைத்து உள்ளது. சில மாவட்டங்களில் மாவட்ட ஆட்சியர் மாற்றத்திற்கு பொதுமக்கள் எதிர்ப்பு தெரிவித்து உள்ளனர். ஆனால், கரூர் மாவட்ட ஆட்சியருக்கு இதுவரை எந்த தரப்பும் ஆதரவு தெரிவித்து தமிழக அரசுக்கு எதிர்ப்பு தெரிவிக்கவில்லை.
கரூர் மாவட்ட ஆட்சியராக இருந்த பிரபு சங்கர் மற்றும் கரூர் மாவட்ட காவல் கண்காணிப்பாளராக இருந்த சுந்தரவதனம் ஆகியோர் மீது குற்றவியல் நடவடிக்கை மேற்கொள்ள வேண்டும். கரூர் மாவட்டத்தில் இயற்கை வளங்களை கொள்ளையடித்த கும்பலுக்கு துணை போன ஆட்சியரும், காவல் கண்காணிப்பாளரும் நீதிமன்றத்தில் பதில் சொல்லி ஆக வேண்டும்.
க.பரமத்தி அருகே திமுகவைச் சேர்ந்த கிளைச் செயலாளர் விவசாயி ஜெகநாதன், கல்குவாரி விதிமுறை மீறல்கள் குறித்து புகார் அளித்ததால் வாகனம் ஏற்றி கடந்த ஆண்டு படுகொலை செய்யப்பட்டார். இதற்கு தமிழ்நாடு முதலமைச்சர் இதுவரை எந்த வித நிவாரணமும் வழங்க முன் வரவில்லை. இதற்கு காரணம் கரூர் மாவட்ட அதிகாரிகள்தான். கனிம வளக் கொள்ளைக்கு துணை நின்றதால்தான், அமலாக்கத்துறை வரை புகார் சென்று சோதனை நடைபெற்று உள்ளது.
கரூர் மாவட்டத்தில் குப்பம் கிராமத்தில் புதிதாக இரண்டு கல் குவாரிகளுக்கு நடந்த கருத்து கேட்புக் கூட்டத்தில், கதிர்மங்கலம் பகுதியைச் சேர்ந்த விவசாயி பழனிச்சாமி, மாவட்ட வருவாய் அலுவலர் கண்ணன் முன்னிலையில் கல்குவாரி உரிமையாளர் ஏற்கனவே கொலை செய்யப்பட்ட ஜெகநாதனைப்போல கொலை செய்து விடுவோம் என மிரட்டல் வருவதாக புகார் அளித்து உள்ளார்.
இது போன்ற அச்சுறுத்தறல்களை மேற்கொள்ளும் சட்டவிரோத கல்குவாரி நிறுவனமான திருமலை ப்ளூ மெட்டல் உரிமையாளர் மீது தமிழக அரசு தக்க நடவடிக்கை மேற்கொள்ள வேண்டும். விவசாயிகளுக்கு உரிய பாதுகாப்பு வழங்க வேண்டும். இல்லாவிட்டால் விரைவில் நடைபெற உள்ள நாடாளுமன்றத் தேர்தலில் மக்கள் வீட்டிற்கு ஓட்டு கேட்க வரும் ஆளும்கட்சி வேட்பாளர்களை, மக்கள் கேள்வி கேட்கும் சூழ்நிலை உருவாகும்” என தெரிவித்தார்.
இதையும் படிங்க:கட்டையன் யானையை பிடிக்க கபில்தேவ் வருகை.. முத்து கும்கி வந்ததும் ஆபரேஷன் ஸ்டார்ட்!
