கரூர்: கரூர் மாவட்டம், தான்தோன்றிமலை ஊராட்சிக்குட்பட்ட காந்திகிராமம் காலனி பகுதியில் அமைந்துள்ளது, ஊராட்சி ஒன்றிய நடுநிலைப்பள்ளி. இந்தப் பள்ளி தொடக்கப்பள்ளியாக ஆரம்பிக்கப்பட்டு, கடந்த 2004ஆம் ஆண்டு நடுநிலைப் பள்ளியாக தரம் உயர்த்தப்பட்டது.
இப்பள்ளியில் எல்கேஜி முதல் எட்டாம் வகுப்பு வரை தமிழ் மற்றும் ஆங்கிலம் ஆகிய இரு மொழிகளிலும் 300க்கும் மேற்பட்ட மாணவ- மாணவியர் கல்வி பயின்று வருகின்றனர்.
இப்பள்ளியில், போர்வெல், மேற்கூரை, பள்ளியின் தரைகள், மின் விசிறி, மாணவ மாணவியர்களுக்கான விளையாட்டு உடைகள், நூலகம், விளையாட்டு உபகரணங்கள், கழிப்பறை வசதி உட்பட தன்னார்வலர்களைக் கொண்டு சிறப்பு உதவியுடன் இயங்கி வருகின்றது. அதிலும் குறிப்பாக, இப்பள்ளி மிகவும் குறுகிய இடத்தில் அமைந்திருப்பதால், இங்கு ஒரு கட்டடத்தில் இரண்டு வகுப்புகள் நடைபெறும் அவல நிலை உள்ளது.
இதனால் பள்ளியின் ஆசிரியர்கள் பள்ளியின் கூரைகளை அகற்றி அடுக்குமாடி பள்ளியாக சீரமைத்தால், குறைந்த இடத்தில் அதிக மாணவர்கள் கல்வி பயில இயலும் என கோரிக்கை வைக்கின்றனர்.
மேலும் அரசுப் பள்ளிகள் தன்னார்வ மற்றும் தனியார் அமைப்பின் மூலம் சிறப்பு நிதியுடன் செயல்பட்டு வருவதற்கு முக்கியக் காரணம், அப்பள்ளியில் பணியாற்றும் ஆசிரியர்கள்.
ஆம். இப்பள்ளியிலும் அவ்வாறு உதவியிருக்கிறார், ஐந்தாம் வகுப்பு ஆசிரியராகப் பணியாற்றி வரும் திலகவதி. இவர் கடந்த 16 ஆண்டுகளாக, இப்பள்ளியில் பணியாற்றி வருகிறார். இந்த ஆண்டு தமிழ்நாடு அரசால் சிறந்த ஆசிரியர்களுக்கு வழங்கக்கூடிய டாக்டர் ராதாகிருஷ்ணன் நல்லாசிரியர் விருதினையும் இவர் பெற்றுள்ளார்.
கரோனா வைரஸ் அச்சுறுத்தல் காரணமாக, அவருக்கு மாவட்ட ஆட்சியர் அலுவலகத்தில், ஆட்சியர் தலைமையில் மாநிலப் போக்குவரத்து துறை அமைச்சர் விஜய பாஸ்கர் கடந்த ஏழாம் தேதி விருதினையும், விருதுப் பணம் ரூ.10 ஆயிரத்தையும் வழங்கினார்.
நல்லாசிரியர் விருது பெற்ற ஆசிரியை திலகவதி அப்பள்ளியில் இதுவரை தனது சொந்த செலவில் ஏழை, எளிய மாணவர்களுக்கு உதவுவது மட்டுமல்லாது, தன்னார்வ தனியார் அமைப்பின் மூலம் நிதியைத் திரட்டி, அரசுப் பள்ளியை தனியார் பள்ளிக்கு இணையாக மாற்றியுள்ளார்.
இதுவரை கரூர் மாவட்ட நிர்வாகத்தின் சார்பில் மாவட்ட ஆட்சியர் மாவட்ட முதன்மைக் கல்வி அலுவலர் உட்பட பலர் அவரை சிறந்த ஆசிரியர் எனப் பாராட்டியிருப்பினும், இந்த ஆண்டு தமிழ்நாடு அரசால் வழங்கப்படும் உரிய விருதான டாக்டர் ராதாகிருஷ்ணன் விருதை அவருக்கு வழங்கி கௌரவித்துள்ளது, தமிழ்நாடு அரசு.
தனக்கு விருதுடன் வழங்கப்பட்ட தொகை ரூ.10 ஆயிரம் மற்றும் தனது சொந்த ஊதியத்திலிருந்தும் ரூ.15 ஆயிரத்தை பள்ளியின் தலைமையாசிரியர் பூங்கொடியிடம் வழங்கி அசத்தியுள்ளார், ஆசிரியை திலகவதி. இதற்கான காரணத்தை அவரே விளக்குகிறார் கேட்போம்.
"பள்ளியின் மூலம் கிடைத்த நல்லாசிரியர் விருது தொகையைப் பள்ளிக்கு அளிப்பதே என்னுடைய நோக்கம். இதுவரை மாவட்ட ஆட்சியர், போக்குவரத்துத் துறை அமைச்சர் போன்ற அனைவரிடமும் விருது பெற்றாலும் நல்லாசிரியர் விருது உண்மையில் என்னை மகிழ்விக்க செய்கிறது.
பள்ளிக்கு தன்னார்வலர்கள் மற்றும் தனியார் அமைப்பின் மூலம் பல நிதியைத் திரட்டி பல நற்செயல்கள் செய்துள்ளேன். பள்ளியை மெருகேற்றுவதில் ஆசிரியருடைய பங்களிப்புத் தேவை என்பதற்காக நல்லாசிரியர் விருது பெற்ற தொகையை பள்ளிக்கு அளித்திருக்கிறேன். இதனால், நான் பெருமை அடைகிறேன்.
மேலும், பள்ளியின் தலைமையாசிரியர் அதிநவீன வகுப்பறை பெற 'நமக்கு நாமே திட்டத்தின்' கீழ் மாவட்ட ஆட்சியரிடம் மூன்றில் ஒரு பகுதி தொகையைச் செலுத்தி வகுப்பறை காண உபகரணங்களைப் பெறலாம் என்று அறிவுறுத்தினார்.
ஆனால், அதற்கு கூடுதலாக ரூ.15 ஆயிரம் தேவை எனவும் கூறினார். எனவே, சிறிதும் யோசிக்காமல் ஸ்மார்ட் வகுப்பறை பெறுவதற்கான விருதுப் பணம் 10 ஆயிரம் மற்றும் தன்னுடைய ஊதியத்திலிருந்து 15 ஆயிரம் என மொத்தமாக ரூ. 25 ஆயிரத்தை தலைமையாசிரியரிடம் வழங்கினேன்" என்கிறார்.
தனியார் பள்ளி மாணவர்களுக்கு கிடைக்கும் அனைத்து வசதிகளும் அரசுப் பள்ளி மாணவர்களுக்கும் கிடைக்க பல்வேறு அர்ப்பணிப்புகளையும், முயற்சிகளையும் செய்யும் இதுபோன்ற ஆசிரியர்கள் கிடைப்பது நமது வரம்!
இதையும் படிங்க: ஊரடங்கில் பள்ளி மாணவர் உருவாக்கிய அட்டகாசமான செயலி!
