முடி திருத்தும் தொழிலாளர்களுக்கு நிவாரண நிதி வழங்குக

கன்னியாகுமரி: 144 தடை உத்தரவால் வாழ்வாதாரம் இழந்து பாதிக்கப்பட்டுள்ள முடி திருத்தும் தொழிலாளர்களுக்கு நிவாரண நிதி வழங்க வேண்டும் என்று ஆதி திராவிடர் முன்னேற்ற இயக்கம் கோரிக்கை விடுத்துள்ளது.

ஆதி திராவிடர் முன்னேற்ற இயக்க நிறுவனத் தலைவர் ஜான் விக்டர்தாஸ் மாவட்ட ஆட்சியர் அலுவலகத்தில் மனு அளித்தார். அந்த மனுவில் கூறியிருப்பதாவது:

தமிழ்நாட்டில் 34 வகையான கடைகளைத் திறப்பதற்கு அனுமதி அளித்து அரசு அறிவிப்பு வெளியிட்டு இருக்கிறது. ஆனால் இதில் முடிதிருத்தும் நிலையங்கள் இடம்பெறவில்லை.

குமரி மாவட்டத்தில் முடி திருத்தும் பணியில் சுமார் 3 ஆயிரம் கடைகள் மூலம் 10 ஆயிரத்திற்கும் மேற்பட்டவர்கள் பிழைப்பு நடத்தி வருகின்றனர். 144 தடை உத்தரவுக்குப் பிறகு அவர்கள் இதுவரை கடைகள் திறக்கவில்லை. இதனால் இவர்கள் வாழ்வாதாரம் கடுமையாக பாதிக்கப்பட்டுள்ளது.

மேலும் தமிழ்நாடு அரசு நல வாரியத்தில் பதிவு செய்த தொழிலாளர்களுக்கு 2000 ரூபாய் வழங்கியது. இதில் பதிவு செய்த உறுப்பினர்களுக்கு நிவாரணநிதி முழுமையாக கிடைக்காமல் அந்த நிதியில் கூட முறைகேடு நடந்துள்ளது. இதுபோல நலவாரியத்தில் பதிவு செய்யாத ஏராளமான முடிதிருத்தும் தொழிலாளர்கள் தமிழக அரசால் புறக்கணிக்கப்பட்டுள்ளனர்.

கோரிக்கை அளித்த மனு

எனவே முடிதிருத்தும் தொழிலாளர்கள் பிரச்சனையை கருத்தில் கொண்டு அவர்களை வறுமையில் இருந்து மீட்க நடவடிக்கை எடுக்க வேண்டும். மேலும், முடி திருத்தும் கடைகளை திறக்க உத்தரவு வரும்வரை தொழிலாளர்களின் நலன் கருதி ரூபாய் 15,000 நிவாரண நிதியாக கிடைக்க வழிவகை செய்ய வேண்டும். இவ்வாறாக அந்த மனுவில் கூறப்பட்டுள்ளது.

இதையும் படிங்க: நிதிப் பற்றாக்குறையைப் போக்க கள்ள நோட்டுகளால் முடியும் - திருநாவுக்கரசர் கருத்து!