கன்னியாகுமரி மாவட்டம் சாமிதோப்பு அய்யா வைகுண்டசாமி தலைமைப்பதியின் வடக்கு ரதவீதியில் தனியாருக்குச் சொந்தமான இடத்தில் நினைவு மண்டபம் கட்டப்பட்டது. அங்கு செல்ல பாதை இல்லாமல் தடுப்புச்சுவர் கட்டப்பட்டுள்ளதாகவும் அதை அகற்றவேண்டும் என்றும் நீதிமன்றத்தில் வழக்கு தொடுக்கப்பட்டது.
இதனையடுத்து, அந்த நினைவு மண்டபத்துக்குச் செல்ல வசதியாக தடுப்புச் சுவரை இடித்து கொடுக்க நீதிமன்றம் உத்தரவிட்டதாக கூறப்படுகிறது. இதை அமுல்படுத்துவதற்காக நேற்று மாலை அந்த பகுதியில் அதிரடிப்படை போலீசார் குவிக்கப்பட்டனர். அதைத் தொடர்ந்து அகஸ்தீஸ்வரம் பஞ்சாயத்து யூனியன் பிடிஒ புஷ்பலதா தலைமையில் கன்னியாகுமரி இன்ஸ்பெக்டர் முத்து, வருவாய் அலுவலர் இப்ராகிம், கிராம நிர்வாக அலுவலர் சிவராகுல் ஆகியோர் தலைமையில் புல்டௌசர் உதவியுடன் தடுப்புச் சுவர் இடிக்கப்பட்டது.
அப்போது அங்கு வந்த வழக்கறிஞர் ஜனா.யுகேந்த் கூறுகையில், எங்கள் பட்டா இடத்தில் உள்ள தடுப்புச் சுவரை இடிக்கக்கூடாது. இடிப்பதை நிறுத்துங்கள் என்று கூறினார்.
இதையடுத்து, ஆவணம் சரிவர இல்லாததால் இடிக்கும் பணி நிறுத்தப்பட்டு உயர் அலுவலர்களுக்கு தகவல் கொடுக்கப்பட்டது. பின்னர் ஆர்டிஒ மயில், தாசில்தார் அப்துல் மன்னா ஆகியோர் சம்பவ இடத்திற்கு சென்று பால.ஜனாதிபதி, ஜனா.யுகேந்திடம் பேச்சுவார்த்தையில் ஈடுபட்டனர். அப்போது இடித்ததற்கு முறையான ஆவணங்கள் சரிவர இல்லாததால் எந்த பதிலும் சொல்லாமல் இடிக்கும் பணி நிறுத்தப்பட்டு அரசு அலுவலர்கள் கலைந்துச் சென்றனர்.
இது குறித்து பாலஜனாதிபதி கூறியதாவது:-
மண் அரிப்பு தடுப்பு சுவர் எங்களுக்கு சொந்தமான இடத்தில் கட்டப்பட்டுள்ளது. அவ்வாறு கட்டப்பட்ட இடத்தில் சுமார் 80 அடிநீளத்தில் அலுவலர்கள் அத்துமீறி சட்டவிரோதமாக இடித்து அகற்றினர். இது தொடர்பாக ஆர்டிஒ விசாரித்தபோது, நிலவுடமையாளர்கள் மீது வழக்கு தொடுக்காமல் இந்த பகுதியை இடித்தது தவறு என்றார்.
