கன்னியாகுமரி மாவட்டம் தென்தாமரைக்குளம் பகுதியைச் சேர்ந்தவர் லட்சுமணன். இவரது மனைவி அம்பாள் (83). இவர்களுக்கு குழந்தைகள் இல்லை. இதில் லட்சுமணன் கடந்த சில ஆண்டுகளுக்கு முன்பு இறந்துவிட்டார். இதனால் அம்பாள் தனது உறவினரான சந்திரனின் வீட்டருகே குடிசை அமைத்து வசித்துவந்தார்.
இந்நிலையில் அந்த குடிசை நேற்று நள்ளிரவு திடீரென தீப்பிடித்து எரிந்தது. இதனைக் கண்ட அக்கம்பக்கத்தினர் ஓடி வந்து தண்ணீர் ஊற்றி தீயை அணைத்தனர். ஆனால் அதற்குள் குடிசை வீடு முற்றிலுமாக எரிந்து நாசமானது. இதில் வீட்டில் தூங்கிக்கொண்டிருந்த அம்பாளும் தீயில் கருகி பரிதாபமாக உயிரிழந்தார்.
இது குறித்து தென்தாமரைக்குளம் காவல் துறையினருக்கு தகவல் கொடுக்கப்பட்டது. இத்தகவலின் அடிப்படையில் கன்னியாகுமரி காவல் ஆய்வாளர் சம்பவ இடத்திற்கு வந்து உடலை கைப்பற்றி உடற்கூறாய்விற்காக ஆசாரிப்பள்ளம் அரசு மருத்துவமனைக்கு அனுப்பிவைத்தனர்.
மேலும் இந்த தீ விபத்து தற்செயலாக நடைபெற்றதா? இல்லை யாரேனும் அடையாளம் தெரியாத நபர்கள் வேண்டுமென்றே குடிசையை தீயிட்டு கொளுத்தி விட்டார்களா? என்பது குறித்து காவல் துறையினர் தீவிரமாக விசாரணை நடத்திவருகின்றனர்.
