திருச்சி: முசிறியைச் சேர்ந்தவர் எல்லப்பன்(24). இவர் மதுபோதையில் இருசக்கர வாகனத்தை ஓட்டிக்கொண்டு கைகாட்டி பகுதி வழியாக இன்று (ஜூன்20) சென்றுள்ளார். அப்போது எதிரே வந்த இருசக்கர வாகனத்தின் மீது மோதியதாகத் தெரிகிறது. இதில் பைக்கில் சென்ற எல்லப்பனுக்கும் எதிரில் பைக்கில் வந்த பெண்ணுக்கும் இடையே தகராறு நடந்துள்ளது. இதனைக் கண்ட அப்பகுதியினர் முசிறி காவல் நிலையத்திற்கு கைகாட்டியில் தகராறு நடப்பதாக தகவல் தெரிவித்துள்ளனர்.
இதையடுத்து சம்பவ இடத்திற்கு போலீசார் சென்றுள்ளனர். அப்போது மது போதையில் இருந்த எல்லப்பனிடம் என்ன தகராறு எனக் கேட்டு விசாரித்துள்ளார். அப்போது அங்கு வந்த எல்லப்பனின் நண்பர் வக்கீல் கார்த்திக் தனது நண்பர்களுடன் சேர்ந்து கொண்டு பெண் தலைமை காவலர் கவிதாவிடம் தகராறு செய்து, கொலை மிரட்டல் விடுத்ததாக கூறப்படுகிறது.
மேலும் காவலர் கவிதா மீது இருசக்கர வாகனத்தை மோதியதாக தெரிகிறது. இதில் கவிதாவின் காலில் காயம் ஏற்பட்டது. இதனைத் தொடர்ந்து சம்பவ இடத்திற்கு சென்ற கூடுதல் போலீசார் எல்லப்பன், வழக்கறிஞர் கார்த்திக் ஆகிய இருவரையும் காவல் நிலையத்திற்கு அழைத்து சென்று விசாரணை செய்தனர்.
பின்னர் எல்லப்பன், கார்த்திக் இருவர் மீதும் வழக்குப் பதிவு செய்த போலீசார் இருவரையும் கைது செய்தனர்.
இதையும் படிங்க: புல்வாமாவில் பயங்கரவாதி சுட்டுக்கொலை
