காஞ்சிபுரம் மாவட்டம் குன்றத்தூர் அடுத்த மணிகண்டன் நகர் பகுதியில் உள்ள அடுக்குமாடி குடியிருப்பில் ஆசாத் (42) என்பவர் வசித்து வருகிறார். இவர் அனகாபுத்தூர் சர்வீஸ் சாலையில் தோல் தொழிற்சாலை நடத்தி வருகிறார். இந்நிலையில், கடந்த சில தினங்களுக்கு முன்பு வீட்டை பூட்டி விட்டு ஆசாத் தனது குடும்பத்துடன் பெங்களூரு சென்றுள்ளார்.
பயணம் முடிந்து பெங்களூருவில் இருந்து இன்று (மே14) காலை வீட்டிற்கு வந்து பார்த்தபோது, வீட்டின் கதவில் இருந்த பூட்டு உடைக்கப்பட்டு கதவு திறந்து கிடப்பதை கண்டு அதிர்ச்சி அடைந்துள்ளார். எனவே உடனடியாக இது குறித்து குன்றத்தூர் போலீசாருக்கு தகவல் அளித்துள்ளார். இந்தத் தகவலை அறிந்து சம்பவ இடத்திற்கு விரைந்து வந்த போலீசார், கொள்ளை சம்பவம் நடந்த வீட்டை சோதனை செய்தனர்.
இந்தச் சோதனையில், “வீட்டிற்குள் நுழைந்த நபர்கள் லாக்கரை உடைத்து 100 சவரன் நகைகளை கொள்ளையடித்துச் சென்றது” தெரியவந்தது. இந்தச் சம்பவம் குறித்து குன்றத்தூர் போலீசார் சிசிடிவி கேமரா காட்சிகளை ஆய்வு செய்து கொள்ளை சம்பவத்தில் ஈடுபட்ட நபர்கள் யார் என்பது குறித்து விசாரணை நடத்தி வருகின்றனர்.
தொழிலதிபர் வீட்டில் 100 சவரன் நகை கொள்ளையடிக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
இதையும் படிங்க: கொள்ளையடிக்க சென்ற வீட்டில் இளம்பெண்ணை பாலியல் வன்கொடுமை செய்த திருடன்!
