கனியாமூர் பள்ளி மாணவியின் செல்போனை வாங்க மறுத்த நீதிமன்றம்

கனியாமூர் தனியார் பள்ளி மாணவி மரணமடைந்த வழக்கை சிபிசிஐடி விசாரித்து வரும் நிலையில், மாணவியின் செல்போனை சிபிசிஐடி போலீசாரிடம் ஒப்படைக்க பெற்றோருக்கு நீதிமன்றம் உத்தரவிட்டுள்ளது.

கள்ளக்குறிச்சி மாவட்டம் கனியாமூர் தனியார் பள்ளியில் அதே பள்ளியில் படித்த மாணவி கடந்தாண்டு ஜூலை 13ஆம் தேதி அதிகாலை விடுதி வளாகத்தில் சடலமாக கண்டெடுக்கப்பட்டார். அவரது உடலை மீட்ட பள்ளி நிர்வாகம் மாவட்ட அரசு மருத்துவமனைக்கு கொண்டு சென்றது. இதனிடையே பெற்றோருக்கு தகவல் கொடுக்கப்பட்டது.

இந்த வழக்கை சிபிசிஐடி விசாரித்து வருகிறது. இதுதொடர்பான விசாரணை சென்னை உயர்நீதிமன்றத்தில் நடைபெற்று வருகிறது. இந்த வழக்கின் விசரணையின் போது, மாணவி இறப்பில் சந்தேகம் உள்ளதாகவும், சிபிசிஐடி விசாரணை சரியில்லை என்றும் அவரது தாய் தொடர்ந்து குற்றச் சாட்டுக்களை வைத்து வந்தார்.

இதனால் வழக்கில் சிறப்பு விசாரணை குழுவை அமைத்த உயர் நீதிமன்றம், விசாரணை தொடர்பான அறிக்கைகளை பெற்று வருகிறது. முன்னதாக, இந்த வழக்கு நீதிபதி வி.சிவஞானம் முன்பு விசாரணைக்கு வந்தபோது, சிறப்பு புலன் விசாரணை குழு மற்றும் சிபிசிஐடி ஆகியவற்றின் அறிக்கைகளை மூடி முத்திரையிடப்பட்ட உறையில் அரசு தலைமை குற்றவியல் வழக்கறிஞர் அசன் முகமது ஜின்னா தாக்கல் செய்தார்.

214 பேர் அடையாளம் காணப்பட்டுள்ளதாகவும், மாணவி பயன்படுத்திய செல்போன் விசாரணைக்காக இன்னும் ஒப்படைக்கப்படவில்லை என்றும் கூறினார். அப்போது மனுதாரர் ராமலிங்கம் தரப்பில், வழக்கறிஞர் சங்கரசுப்பு ஆஜராகி, தொழில்நுட்பம் வளர்ந்துள்ள காலத்தில் செல்போனை ஒப்படைத்தால் தான் விசாரணை நடத்த முடியும் என்றில்லை. அதை ஒப்படைப்பது குறித்து விளக்கத்தை பெற்று தெரிவிக்க அவகாசம் கோரினார்.

அதோடு உடற்கூறாய்வு முறையாக நடைபெறவில்லை என்று வாதிட்டார். இதனை கேட்ட நீதிபதி, உடற்கூறாய்வு மூலம் எப்படி இறந்தார்கள் என்பதை மட்டுமே தெரிந்து கொள்ள முடியும். மரணத்திற்கான காரணத்தை கண்டறிய செல்போன் உரையாடல்களும் விசாரணைக்கு அவசியம் என்று தெரிவித்தார். அதோடு நியாயமான விசாரணை கேட்கும் மனுதாரர் தனது மகள் பயன்படுத்திய செல்போனை ஒப்படைக்க வேண்டும் என்று உத்தரவிட்டார்.

குறிப்பாக செல்போனை ஒப்படைத்தது தொடர்பாக மனுத்தாக்கல் செய்ய பெற்றோருக்கும், அதை ஆய்வு செய்து அறிக்கையாக தாக்கல் செய்ய காவல் துறைக்கும் உத்தரவிட்டு வழக்கு விசாரணையை டிசம்பர் 15ஆம் தேதிக்கு தள்ளிவைத்தார். இந்த நிலையில் இன்று (ஜனவரி 20) விழுப்புரம் குற்றவியல் நடுவர் நீதிமன்றத்திற்கு வந்த மாணவியின் தாயார் செல்வி நீதிமன்ற உத்தரவுபடி மாணவியின் செல்போனை சிபிசிஐடி போலீசாரிடம் ஒப்படைக்காமல் விழுப்புரம் நீதிமன்றத்தில் ஒப்படைக்க வந்தார்.

இந்த போனை வாங்க மறுத்த நீதிபதி, சென்னை உயர்நீதிமன்ற உத்தரவுபடி சிபிசிஐடி போலீசாரிடம் மட்டுமே செல்போனை ஒப்படைக்க வேண்டும் என்று அறிவுறுத்தி திருப்பி அனுப்பினர். இதனை தொடர்ந்து மாணவியின் பெற்றோர் செல்போனை சிபிசிஐடி போலீசாரிடம் ஒப்படைக்க உள்ளனர்.