கள்ளக்குறிச்சியை அடுத்துள்ள குதிரைச்சந்தலில் அமைந்துள்ளது நூற்றுக்கணக்கான மாணவ, மாணவிகள் படிக்கும் அரசு மேல்நிலைப் பள்ளி. பன்னிரெண்டாம் வகுப்பு மாணவர்கள் பொதுத்தேர்வு முடிந்து இந்தாண்டு பள்ளியைவிட்டுச் செல்லும் காரணத்தால், முதுநிலை தமிழாசிரியையான துரைமணிமேகலை, அம்மாணவர்களிடம் நிறை, குறைகளைக் கடிதமாக எழுதிக் கொடுக்குமாறு கேட்டுள்ளார்.
பள்ளியுடனும், ஆசிரியர்களுடனுமான தங்களது அனுபவங்ளை மாணவர்கள் அக்கடிதங்களில் பகிர்ந்துகொண்டனர். அவற்றை எல்லாம் படித்து நெகிழ்ந்துகொண்டிருந்த ஆசிரியை மணிமேகலையை, ஒரு மாணவியின் உருக்கமான கடிதம் மட்டும் வெகுவாகப் பாதித்தது.
மாணவி ஹிரானி என்பவர் எழுதிய அக்கடிதத்தில், "இப்பள்ளியில் படித்ததில் நாங்கள் பெருமையடைகிறோம். அதேவேளையில் பள்ளியில் உள்ள பெண்கள் கழிப்பறை சுகாதாரமற்ற நிலையிலும், பயன்படுத்த முடியாத மோசமான நிலையிலும் இருக்கிறது.
மேற்கூரை இல்லாத அந்தச் சிறிய கழிப்பறையில், சானிட்டரி நாப்கின் எந்திரம் செயல்படவில்லை. மேலும், தண்ணீர் வசதி இல்லாமல் மிகவும் சிரமத்திற்குள்ளானோம். இந்தாண்டு படிப்பை நாங்கள் முடித்துவிட்டாலும்கூட, இனி இங்கு படிக்கும் மாணவிகளாவது சுகாதாரமான கழிப்பறையைப் பயன்படுத்தும்வகையில் சீரமைத்துத் தர வேண்டும்" என எழுதியிருந்தார்.
இதனையடுத்து வேறு ஒரு பள்ளியில் ஆசிரியராகப் பணியாற்றும் தனது கணவரிடம் ஆலோசித்து, கழிப்பறையைப் புனரமைக்க முடிவுசெய்தார் மணிமேகலை. இருவரும் தங்களது ஃபேஸ்புக் நண்பர்கள் உதவியை நாடினர்.
அப்போது அபுதாபியில் வேலைபார்த்துவரும் கோவிந்தராசன் என்பவர் நாற்பதாயிரம் ரூபாய் நன்கொடையாகத் தருவதாகக் கூறியதோடு, புனரமைத்த பின் அக்கழிப்பறையை கடிதம் எழுதிய அம்மாணவியைக் கொண்டே திறக்கச் செய்ய வேண்டும் என்ற வேண்டுகோளும் வைத்தார். பின்னர் அப்பணத்தைக் கொண்டு மேற்கூரை, தண்ணீர் வசதி எனக் கழிப்பறை முற்றிலுமாகப் புனரமைக்கப்பட்டது.
இதுபோன்ற பிரச்னைகளை தைரியமாகவும், அக்கரையோடும் தெரிவித்த மாணவியின் கையாலேயே பின்னர் அக்கழிப்பறைக் கட்டடம், மாவட்ட முதன்மைக் கல்வி அலுவலர், தலைமையாசிரியர் முன்னிலையில் திறந்துவைக்கப்பட்டது. தங்களுக்கான தேவையைப் போராடி பெற்றே தீருவது என்ற ஹிரானிகளும், ஹிரானி போன்றோரை ஊக்கப்படுத்தி இந்த நிலைக்குக் கொண்டுவந்திருக்கும் மணிமேகலைகளும், சமூக அக்கறையுடன் உதவிய கோவிந்தராசன்களும்தான் எதிர்காலத்திற்கான நம்பிக்கையாக இருக்கின்றனர்.
இதையும் படிங்க: மழலையர் பள்ளிகளுக்கான விடுமுறை திடீரென நிறுத்தி வைப்பு!
