பவானி அருகே உள்ள லட்சுமி நகர் பகுதியில் லாரி பழுது நீக்கும் தொழில் செய்து வருபவர் சந்தோஷ்குமார். கடந்த சில நாட்களுக்கு முன்பு, இவர் ஒரு லாரியை பழுது நீக்கி கொடுத்துள்ளார்.
இந்நிலையில், அந்த லாரி விழுப்புரம் பகுதியில் திருட்டு வழக்கில் சம்பந்தப்பட்ட லாரி என்பதால் விழுப்புரம் மாவட்ட காவல் துறையினர் சந்தோஷ்குமாரை விசாரணைக்காக அழைத்து சென்றனர். பின்னர், மீண்டும் அவரது வீட்டில் விட்டு சென்றுள்ளனர்.
இந்நிலையில், சந்தோஷ்குமார் உடல் நிலை பாதிக்கப்பட்டு மருத்துவமனையில் சிகிச்சைக்காக அனுமதிக்கப்பட்டுள்ளார்.
இதனிடையே, விழுப்புரம் மாவட்ட காவல் துறையினர் சந்தோஷ் குமாரைத் தாக்கியதாலேயே அவர் உடல் நிலை பாதிக்கப்பட்டு மருத்துவமனையில் அனுமதிக்கப்பட்டுள்ளதாகக் கூறி ஈரோடு அந்தியூர், மேட்டூர் செல்லும் சாலையில் லாரி பழுதுபார்க்கும் தொழிலாளர்கள், உரிமையாளர்கள் என நூற்றுக்கும் மேற்பட்டோர் இன்று திடீர் சாலை மறியலில் ஈடுபட்டனர்.
அப்போது, சந்தோஷ் குமாரை தாக்கிய காவல் துறையினர் மீது நடவடிக்கை எடுக்க வலியுறுத்தினர்.
இது குறித்து தகவல் அறிந்த காவல் துறையினர், சம்பவ இடம் விரைந்து சென்று சாலை மறியலில் ஈடுபட்டவர்களிடம் பேச்சுவார்த்தினர்.
தொடர்ந்து, அவர்களின் கோரிக்கை குறித்து உரிய நடவடிக்கை எடுப்பதாக காவல் துறையினர் உறுதியளித்ததைத் தொடர்ந்து போராட்டத்தைக் கைவிட்டு அங்கிருந்து கலைந்து சென்றனர்.
சாலை மறியலால், அப்பகுதியில் சுமார் மூன்று மணி நேரம் போக்குவரத்து பாதிப்பு ஏற்பட்டது.
