தமிழர் திருநாளாம் தைப்பொங்கலை முன்னிட்டு ஜல்லிக்கட்டுப் பேரவையின் சார்பில் இரண்டாவது ஆண்டாக ஈரோடு மாவட்டம் பவளத்தாம்பாளையம் பகுதியிலுள்ள தனியார் பள்ளி விளையாட்டு மைதானத்தில் வரும் 18ஆம் தேதி ஜல்லிக்கட்டுப் போட்டி நடைபெறவுள்ளது.
ஜல்லிக்கட்டுப் போட்டி நடைபெறவுள்ள 10 ஏக்கருக்கும் மேற்பட்ட இடத்தில் மேற்கொள்ளப்பட்டுள்ள முன்னேற்பாட்டுப் பணிகளை மாவட்ட ஆட்சியர் சி. கதிரவன், மாவட்ட காவல் கண்காணிப்பாளர் சக்தி கணேசன் ஆகியோர் நேரில் சென்று ஆய்வுசெய்தனர்.
போட்டியில் கலந்துகொள்ளவுள்ள காளைகள் பரிசோதனை செய்யும் இடம், மாடுபிடி வீரர்கள் பதிவுசெய்யும் இடம், காளைகள் விடும் வாடிவாசல் பகுதி, பார்வையாளர்கள் அமர்விடம், காளைகள், மாடிபிடி வீரர்கள் காயமடைந்தால் அவர்களை அழைத்துச் செல்வதற்குரிய அவசர ஊர்தி வசதி, கால்நடை மருத்துவர்கள் காளைகளைப் பரிசோதனை செய்யும் இடம் ஆகியவற்றை பார்வையிட்டனர்.
மேலும் போட்டி நடைபெறவுள்ள சமயங்களில் முதலுதவி வழங்குவதற்குரிய மருத்துவர்கள், மருத்துவ ஊழியர்கள் தயாரான நிலையிலும், போட்டியின்போது காயம்படும் காளைகளை எடுத்துச் செல்வதற்குரிய அவசர ஊர்தி, மாடுபிடி வீரர்களைக் கொண்டுசெல்லும் அவசர ஊர்தி தயார் நிலையிலும் இருக்க வேண்டும் என்று அறிவுறுத்தினர்.
ஜல்லிக்கட்டுப் போட்டிகள் நடைபெறும் இடத்தில் தேவையான அடிப்படை வசதிகள் மேற்கொள்ளப்பட வேண்டிய முக்கியத்துவம், அவசியம் குறித்து ஜல்லிக்கட்டுப் போட்டிகளை நடத்துபவர்களுக்கு அறிவுறுத்தப்பட்டது.
இதனைத் தொடர்ந்து, செய்தியாளர்களிடம் மாவட்ட ஆட்சியர் கதிரவன் கூறுகையில், "கடந்தாண்டை விடவும் இந்தாண்டு தமிழ்நாட்டின் பல்வேறு பகுதிகளிலிருந்து 225 காளைகள் கலந்துகொள்ள வாய்ப்புள்ளது. பார்வையாளர்கள் போட்டிகளைக் காண்பதற்கு சிறப்பு ஏற்பாடுகள் மேற்கொள்ளப்பட்டுள்ளது.
மேலும் மது அருந்தி காளைகளைப் பிடித்திட மாடுபிடி வீரர்களுக்கு கண்டிப்பாக அனுமதி வழங்கப்படாது. காலை 8 மணியிலிருந்து 2 மணிவரை ஜல்லிக்கட்டுப் போட்டிகள் நடத்தப்படவுள்ள நிலையில் பாதுகாப்புப் பணியில் சுமார் 500-க்கும் மேற்பட்ட காவல் துறையினர் ஈடுபடுத்தப்படவுள்ளனர்.
போட்டிகளில் கலந்துகொள்ளவுள்ள காளைகளுக்கும், மாடுபிடி வீரர்களுக்கும் ஆயுள் காப்பீட்டு வசதிகள் செய்யப்பட்டுள்ளன. விபத்துகள் இல்லாத, யாருக்கும் பாதிப்பில்லாத வகையில் போட்டிகளைச் சிறப்பான முறையில் நடத்திடுவதற்குரிய அனைத்து முன்னேற்பாட்டுப் பணிகளும் மேற்கொள்ளப்பட்டுள்ளன" எனத் தெரிவித்தார்.
இதையும் படிங்க:
அவனியாபுரம் ஜல்லிக்கட்டு - காளைகளுக்கான முன்னேற்பாடுகள் தீவிரம்
