இதயம் காப்போம் விழிப்புணர்வு மாரத்தான் - ஆயிரத்திற்கும் மேற்பட்டோர் பங்கேற்பு!

ஈரோடு : இதயம் பாதுகாப்போம், இதயத்தை வலுப்படுத்துவோம் என்பதை வலியுறுத்தி ஈரோட்டில் தனியார் மருத்துவமனை, ரோட்டரி அமைப்புகள் சார்பில்  மாரத்தான் நடைபெற்றது. இதில் ஆயிரத்திற்கும் மேற்பட்டவர்கள் கலந்து கொண்டார்கள்.

ஆண்டுதோறும் செப்டம்பர் மாதம் 29ஆம் தேதி நாடு முழுவதும் இதய பாதுகாப்பு விழிப்புணர்வு நாள் கடைப்பிடிக்கப்பட்டு வருகிறது. இந்த நாளில் உடலின் இன்றியமையாத பாகமான இதயத்தைப் பாதுகாப்பது குறித்தும், இதயத்தைப் பாதுகாப்பதற்கான வழிமுறைகள் குறித்தும், விழிப்புணர்வு நிகழ்ச்சிகள் நாடு முழுவதும் நடத்தப்பட்டு வருகிறது.

அதன் ஒரு பகுதியாக ஈரோட்டில் தனியார் மருத்துவமனை, ரோட்டரி அமைப்புகள் சார்பில் இதய பாதுகாப்பு விழிப்புணர்வு மாரத்தான், வாக்கத்தான் நகரின் முக்கிய வீதிகளில் இன்று நடைபெற்றது. ஈரோடு சுற்றுவட்டாரப் பகுதிகளைச் சேர்ந்த தனியார் அமைப்பினர், தன்னார்வ ஆர்வலர்கள் பலர் ஆர்வத்துடன் கலந்து கொண்டனர்.

ஈரோடு வ.உ.சி.பூங்கா விளையாட்டு மைதான வளாகத்தில் மாவட்ட காவல் கண்காணிப்பாளர் சக்தி கணேசன் கொடியசைத்துத் தொடங்கி வைத்ததுடன் அவரும் பங்கேற்றார். இந்நிகழ்ச்சியின் போது 24 மணி நேரமும் தொடர்ந்து இயங்கி வரும் இதயத்திற்கு முறையான பாதுகாப்பை வழங்கிட வேண்டும் என்றும், முறையான பரிசோதனை மேற்கொண்டு இதயப் பாதுகாப்பை வலுப்படுத்திட வேண்டும் என்றும், உடற்பயிற்சியை மேற்கொண்டு ஏனைய உடல் உபாதைகளை குறைத்து இதயத்திற்கு ஊக்கம் கொடுத்திட வேண்டும் என்பன உட்பட விழிப்புணர்வு வாசகங்கள் அடங்கிய துண்டுப்பிரசுரங்கள் பொதுமக்களுக்கு விநியோகிக்கப்பட்டன. மேலும்,இதில் முதலாவதாக வந்தவர்கள் உள்பட நிகழ்ச்சியில் கலந்து கொண்ட அனைவருக்கும் சான்றிதழ்கள் வழங்கப்பட்டன.

இதையும் படிங்க: