ஈரோடு மாவட்டம் சூளையைச் சேர்ந்த தம்பதி சதீஸ்குமார் -பிரபாவதி. இவர்களது மகள் சாதனா (7) ஈரோடு பவானி சாலையில் உள்ள தனியார் கிறிஸ்து ஜோதி பள்ளியில் இரண்டாம் வகுப்பு படித்து வந்துள்ளார். இந்நிலையில், சாதனாவுக்கு நவம்பர் 9ஆம் தேதி திடீர் உடல்நலக்குறைவு ஏற்பட்டுள்ளது.
இதனையடுத்து, பள்ளியில் செயல்பட்டு வரும் மருத்துவமனையில் சிறுமி சாதனாவிற்கு மருத்துவர் திருமூர்த்தி சிகிச்சையளித்துள்ளார். தொடர்ந்து சிறுமியின் உடல்நிலை மோசமடைந்து சிறுநீரகம், கல்லீரல் பாதிக்கப்பட்டுள்ளதாகக் கூறப்படுகிறது.
பின்னர் மேல்சிகிச்சைக்காக சேலம் அரசு மருத்துவமனையில் அனுமதிக்கப்பட்ட சிறுமி சாதனா நவம்பர் 13ஆம் தேதி சிகிச்சை பலனின்றி உயிரிழந்தார். இந்த நிலையில், பவானி சாலையில் செயல்பட்டு வரும் தனியாருக்குச் சொந்தமான பள்ளியில் உள்ள மருத்துவமனை மருத்துவர் திருமூர்த்தியின் தவறான சிகிச்சையால் சிறுமி உயிரிழந்ததாக குற்றச்சாட்டு எழுந்துள்ளது. இதற்கு காரணமான மருத்துவர் மீது நடவடிக்கை எடுக்க வலியுறுத்தி ஈரோடு எஸ்பி சக்திகணேசனிடம் சிறுமியின் பெற்றோர் புகார் அளித்தனர்.
மேலும், சிறுமியின் குடும்பத்திற்கு இழப்பீடு வழங்க வேண்டும் என கோரிக்கை விடுத்துள்ளனர்.
இதையும் படிங்க: கொடுத்த பணத்தை திருப்பிக் கேட்ட நபரைத் தாக்கிய திமுக பிரமுகர்!
