ஈரோடு மாவட்ட மக்களின் முக்கிய நீராதாரமாக பவானிசாகர் அணை உள்ளது. பவானிசாகர் அணையின் நீர்மட்ட உயரம் 105 அடி ஆகும். நீர் இருப்பு 32.8 டிஎம்சி ஆக உள்ளது. இந்நிலையில், பவானிசாகர் அணைக்கு நீர்வரத்து 4 ஆயிரம் கன அடியாக இருந்தது. தற்போது அணையின் நீர்வரத்து 6 ஆயிரத்து 971 கன அடியாக அதிகரித்துள்ளது.
காற்றழுத்தத் தாழ்வு மண்டலம் காரணமாக மீண்டும் மழை பெய்ய வாய்ப்புள்ளதால் அணை நிரம்பும் என எதிர்பார்க்கப்படுகிறது. இன்று (செப்.13) காலை நிலவரப்படி அணையின் நீர்மட்டம் 99.76 அடியாகவும், நீர்வரத்து 6 ஆயிரத்து 971 கனஅடியாகவும் உள்ளது.
மேலும், அணையில் இருந்து 2 ஆயிரத்து 750 கனஅடி நீர் வெளியேற்றப்படுகிறது. நீர் இருப்பு 28.61 டிஎம்சியாக உள்ளது. அணைக்கு நீர்வரத்து அதிகரித்து வருவதால் விவசாயிகள் மகிழ்ச்சி அடைந்துள்ளனர்.
