தற்கொலை நாடகத்தை காட்டிக் கொடுத்த இளைஞரின் செயல்

திண்டுக்கல் மாவட்ட ஆட்சியர் அலுவலகத்தில் ஒரே குடும்பத்தைச் சேர்ந்த 10 பேர் தீக்குளித்து தற்கொலை செய்து கொள்ள முயற்சித்தனர். அப்போது அவர்களுடன் வந்த இளைஞரின் செயலால் தற்கொலை நாடகம் என கண்டுபிடிக்கப்பட்டது.

திண்டுக்கல்: சூலூர் பகுதியைச் சேர்ந்தவர் வெள்ளையம்மாள். இவருக்கு கடந்த சில ஆண்டுகளுக்கு முன்பு அதே பகுதியில் அரசால் 2 சென்ட் இலவச வீட்டுமனை பட்டா வழங்கப்பட்டுள்ளது. இந்த பட்டாவை அதே பகுதியைச் சேர்ந்த முருகன் என்ற அரசு ஊழியர் வாங்கி வைத்துக்கொண்டு கொடுக்காமல் இருந்துள்ளார்.

இதையடுத்து வெள்ளையம்மாள் மாவட்ட ஆட்சியர், மாவட்ட காவல் கண்காணிப்பாளர் ஆகியோரிடம் புகார் அளித்துள்ளார். ஆனால் எந்த நடவடிக்கையும் எடுக்கப்படவில்லை என தெரிகிறது.

10 பேர் தீ குளிக்க முயற்சி

மேலும் பட்டாவை கேட்டு சென்றபோது வெள்ளையம்மாளை முருகனும் அவரது தம்பி முனுசாமியும் மிரட்டியதாக கூறப்படுகிறது. இந்நிலையில் இன்று (ஆக.23) வெள்ளையம்மாள் அவரது குடும்பத்தினர் 10 பேர் மாவட்ட ஆட்சியர் அலுவலகத்திற்கு மண்ணெண்ணெய் கேனுடன் சென்றனர். இதனைக் கண்ட காவல் துறையினர் அவர்களிடம் இருந்த மண்ணெண்ணெய் கேனை பறிமுதல் செய்தனர்.

பின்னர் விசாரணையில் மாவட்ட ஆட்சியர் அலுவலகத்தில் மனு எழுதித் தரும் ஒருவர் தந்த யோசனையின்படி வெள்ளையம்மாள் ஒரு வாட்டர் கேனில் தண்ணீரில் மேலாக மண்ணெண்ணெய் ஊற்றிக் கொண்டு நாடகமாடியது தெரியவந்தது.

காட்டிக்கொடுத்த இளைஞரின் செயல்

மேலும் வெள்ளையம்மாள் உடன் வந்த இளைஞர் கேமராவை பார்த்தவுடன் சிரித்துக்கொண்டே மீசையை முறுக்கியது சந்தேகத்தை ஏற்படுத்தியது. இதுதொடர்பான விசாரணையில் தற்கொலை, நாடகம் என்பது வெளிச்சத்துக்கு வந்தது. வெள்ளையம்மாள், சகாயமேரி ஆகிய இரண்டு பெண்கள் மீது காவல்துறையினர் வழக்குப்பதிவு செய்தனர்.

மாவட்ட ஆட்சியர் எச்சரிக்கை

இதுகுறித்து மாவட்ட ஆட்சியர் விசாகன் கூறுகையில், "திண்டுக்கல் மாவட்ட ஆட்சியர் அலுவலகத்தில் பொதுமக்கள் பல்வேறு பிரச்னைகளை முன்னிலைப்படுத்தி மண்ணெண்ணெய் மற்றும் பெட்ரோல் கேனுடன் வருகின்றனர். சாதாரண சொத்து பிரச்னைக்கு கூட மண்ணெண்ணெய் கேனுடன் மாவட்ட ஆட்சியர் அலுவலகத்திற்கு வருகின்றனர்.

இதுபோன்ற நபர்கள் மீது சட்டப்பூர்வமாக நடவடிக்கை எடுக்கப்படும். தங்களது பிரச்னையை அலுவலர்களிடம் மனுக்கள் மூலம் தெரிவிக்கலாம். தனியார் தொண்டு நிறுவனங்கள் மற்றும் நேரு யுவகேந்திரா மூலம் மனுக்கள் எழுதுவதற்கு ஏற்பாடு செய்யப்படும்" என்றார்.

மேலும் ஒரு தற்கொலை முயற்சி

இதேபோல் திண்டுக்கல் மேற்கு மரியநாதபுரத்தைச் சேர்ந்தவர் சகாயமேரி (54). இவரது கணவர் ஜேம்ஸ். இவர் கடந்த 2008ஆம் ஆண்டு இறந்துவிட்டார்.

அவரது இறப்பு சான்றிதழ் வழங்க கோரி சகாயமேரி மாநகராட்சி அலுவலகத்தில் பலமுறை மனு அளித்தும், சான்றிதழ் கொடுக்காமல் அலைகழிக்கப்பட்டதாக கூறப்படுகிறது. இதனால் மனமுடைந்த சகாயமேரி மாவட்ட ஆட்சியர் அலுவலகத்தில் மண்ணெண்ணெய் ஊற்றி தீ குளிக்க முயற்சி செய்தார்.

அப்போது அங்கு பாதுகாப்பு பணியில் இருந்த காவல் துறையினர் அவர் மீது தண்ணீரை ஊற்றி காப்பாற்றினர்.

இதையும் படிங்க: சிறைக்குள் அதிசயம்; உல்டா சந்திரமுகியான மீரா மிதுன்!