திண்டுக்கல் மாவட்டம் கொடைக்கானலில் வனவிலங்குகளின் நடமாட்டம் அதிகரித்து வருகிறது. இந்நிலையில் முக்கிய பகுதிகளான நாயுடுபுரம், பாம்பார்புரம், அப்சர்வேட்டரி, செண்பகனூர், அண்ணாசாலை, பேருந்துநிலையப் பகுதி, டிப்போ, எரிச்சாலை உள்ளிட்ட பல்வேறு இடங்களில் காட்டெருமைகள் அதிக அளவில் கூட்டம் கூட்டமாக உலா வருகின்றன.
இதனால் பொதுமக்கள் பெரும் அவதிக்குள்ளாகி வருகின்றனர். மேலும், சாலைகளில் காட்டெருமைகள் கூட்டமாக வந்து வாகனங்களை வழி மறித்து போக்குவரத்திற்கு பெரும் இடையூரை ஏற்படுத்துகின்றன.
இதனால், வாகன ஓட்டிகள் பதற்றம் அடைகின்றனர். இதற்கிடையில், காட்டெருமைகள் பகல் நேரம் மட்டுமல்லாமல் இரவு நேரங்களிலும் குடியிருப்பு பகுதிக்குள் நுழைந்து பெரும் அட்டகாசம் செய்து வருவதாக பொதுமக்கள் குற்றம் சாட்டுகின்றனர்.
இதுகுறித்து வனத்துறையினரிடம் தெரிவித்தும், அவர்கள் தற்காலிகமாக காட்டெருமைகளை விரட்டி விட்டு சென்று விடுகின்றனர்.
சாலைகளில் செல்லும் காட்டெருமைகளால் உயிருக்கு ஆபத்து ஏற்படும் சூழலில் வனத்துறை அலுவலர்கள் அலட்சியம் காட்டுவதாக பொதுமக்கள் தெரிவிக்கின்றனர். எனவே நகர் பகுதிக்குள் காட்டெருமைகள் வராமல் இருக்க வனத்துறை அலுவலர்கள் நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.
இதையும் படிங்க: ஆற்றில் திரியும் பன்றிகளால் பொதுமக்கள் அச்சம்: நடவடிக்கை எடுக்கக் கோரிக்கை!
