திண்டுக்கல்: திண்டுக்கல் மாவட்டத்தில் உள்ள பழனி முருகன் கோயிலுக்கு நாகாலாந்து ஆளுநர் இல.கணேசன் இன்று (ஜன.04) வருகை தந்தார். பழனி திருக்கோயிலுக்குச் சொந்தமான தண்டபாணி நிலையத்திற்கு வருகை தந்த ஆளுநர் இல.கணேசனுக்கு திண்டுக்கல் மாவட்ட ஆட்சியர் பூங்கொடி, மாவட்ட காவல்துறை கண்காணிப்பாளர் பிரதீப் ஆகியோர் பூங்கொத்து கொடுத்து வரவேற்றனர். மேலும், அவருக்கு துப்பாக்கி ஏந்திய போலீசார் அணிவகுப்பு மரியாதை செய்தனர்.
இதன் பின்னர் செய்தியாளர்களைச் சந்தித்த ஆளுநர் இல.கணேசன் தெரிவித்ததாவது, "சுதந்திரப் போராட்ட வீரர்கள் வீரபாண்டிய கட்டபொம்மன் மற்றும் வேலு நாச்சியார் ஆகியோர் தொடர்பான விழாவில் பங்கெடுக்க மதுரை வந்தேன். அதனைத் தொடர்ந்து, கோவையில் நடைபெறும் உலகளாவிய தமிழர்கள் மாநாடு நிகழ்ச்சியில் பங்கெடுக்கச் சாலை மார்க்கமாக செல்லும் வழியில் பழனி முருகனை தரிசிக்க வந்தேன்" என்று தெரிவித்தார்.
இதன் தொடர்ச்சியாக பழனி வையாபுரி கண்மாய் அசுத்தமான நிலையில் உள்ளதால் அதனை சுத்தப்படுத்த மத்திய அரசிடம் பரிந்துரைக்கப்படுமா என செய்தியாளர்கள் கேட்டபோது, "புண்ணிய நதிகளின் புனிதத்தை யாராலும் கெடுக்க முடியாது, அவற்றின் தூய்மையை மட்டுமே கெடுக்க முடியும். இதுகுறித்து முழு தகவல்களைப் பெற்று மத்திய அரசின் கவனத்திற்கு கண்டிப்பாக கொண்டு செல்வேன்" என்று தெரிவித்தார்.
இதனை அடுத்து, பழனி மலைக் கோயிலுக்கு சென்று பழனி முருகனை தரிசனம் செய்த நாகாலாந்து ஆளுநர் இல.கணேசனை, பாஜக மாநில பொதுச் செயலாளர் ராம சீனிவாசன், பாரதிய ஜனதா கட்சியின் மாவட்ட தலைவர் கனகராஜ், வழக்கறிஞர் திருமலைசாமி உள்ளிட்ட பலர் வரவேற்பு அளித்தனர்.
இதையும் படிங்க: பொங்கல் தொகுப்புடன் வெள்ளம் பாதித்த மாவட்ட மக்களுக்கு ரூ.5,000 வழங்க ஈபிஎஸ் வலியுறுத்தல்!
