தமிழர் திருநாளாம் தைத்திருநாளை முன்னிட்டு தமிழ்நாடு அரசு ரேஷன் அட்டை வைத்திருப்பவர்களுக்கு பச்சரிசி, வெல்லம், திராட்சை, முந்திரி, கரும்பு மற்றும் ஆயிரம் ரூபாய் ஆகியவற்றை பொங்கல் பரிசுத் தொகுப்பாக வழங்கப்படும் என அறிவித்தது. இதற்கான விழா கடந்த மாதம் சென்னையில் நடைபெற்றது.
இதனை முதலமைச்சர் எடப்பாடி பழனிசாமி தொடங்கி வைத்தார். உள்ளாட்சித் தேர்தல் நடைபெற்றததன் காரணமாக இந்தத் திட்டம் தற்காலிகமாக நிறுத்தி வைக்கப்பட்டிருந்த நிலையில், வியாழக்கிழமை முதல் தமிழ்நாடு முழுவதும் உள்ள நியாய விலைக் கடைகள் மூலமாக பொங்கல் பரிசு பொதுமக்களுக்கு விநியோகம் செய்யப்பட்டு வருகின்றது. அதன்படி திண்டுக்கல் மாவட்டத்திலும் நியாய விலைக் கடைகள் மூலம் பொங்கல் பரிசு வழங்கப்பட்டது.
திண்டுக்கல் மாநகராட்சி 19, 20 வார்டுக்கு உட்பட்ட கடை எண் 11A நியாய விலை கடையில் அதிமுகவைச் சேர்ந்தவர்கள் பொதுமக்களுக்கு பொங்கல் பரிசு மற்றும் ஆயிரம் ரூபாயை வழங்கினர். அரசு வழங்கும் பொங்கல் பரிசை அதிமுகவினர் பொதுமக்களிடம் வாக்கு சேகரிக்கும் வகையில் வழங்கக்கூடாது என்று அமமுகவினர், அதிமுகவினருடன் வாக்குவாதத்தில் ஈடுபட்டனர்.
பின்னர் இரு தரப்பினருக்குமிடையே கைகலப்பு ஏற்பட்டதை அடுத்து அங்கிருந்து அதிமுகவினர் வெளியேறினர். இதனால் அப்பகுதியில் சிறிது நேரம் பரபரப்பு நிலவியது.
இதையும் படிங்க: பொங்கல் பரிசு வழங்க வைத்திருந்த பணம் மாயம் -போலீசார் விசாரணை
